Gunstige prysneigings in plaasverkope is in Limpopo, KwaZulu-Natal en Gauteng waargeneem met slegs 14 distrikte waar pryse die afgelope jaar gedaal het.
Hierdie ontleding van grondverkope in Suid-Afrika is van transaksies vir grond wat groter is as 20 ha in Limpopo, KwaZulu-Natal en Gauteng vanaf Oktober verlede jaar tot September vanjaar.
In Limpopo was 536 ooreenkomste wat 202 651 ha teen R2,830 miljard behels het. Daarvan was 18% transaksies van kleur. Dié soort transaksies sluit in verhandelings tussen individue, regeringsaankope van landbougrond en grond verkry vir stedelike ontwikkeling.
Dit het 16% van al die verhandelde hektare in Limpopo teen R443 miljoen (15,6 % van die totale waarde) behels. Altesame 187 (35%) van die transaksies was vir grond kleiner as 50 ha met 189 transaksies vir grond groter as 300 ha.
In Bela-Bela is 18 transaksies beklink, wat die gemiddelde prysneiging vir die jaar tot September met 24,9% verbeter het. In Soekmekaar is 38 transaksies van 7 475 ha aangeteken, teen 'n gemiddelde hektaarprys van R54 442.
Altesame 327 transaksies in KwaZulu-Natal het grond van 116 946 ha teen R2,856 miljard behels. Daarvan was 30% transaksies van kleur wat 39 933 ha (34,1%) teen R1 001 miljoen behels het.
Sowat 30% van die transaksies was vir grond groter as 300 ha, terwyl 33% vir grond kleiner as 50 ha was. In Vryheid is vyf transaksies afgehandel teen 'n gemiddelde prys van R5 442 per hektaar.
In Gauteng was daar 434 transaksies wat 88 097 ha teen R6,552 miljard behels het. Daarvan was 97 (22%) ooreenkomste van kleur. Byna 60% van die transaksies was vir grond kleiner as 50 ha.
Lees die verskillende afdelings van die ontledings van Plaasverkope op Landbou.com hier:
* Statistiek oor die verhandeling van landbougrond per distrik binne 'n provinsie vir die afgelope 12 maande.
* Opsomming: Meer besonderhede oor plaasverkope binne 'n distrik vir die afgelope 12 maande.
* Verspreiding bevat besonderhede oor die randwaarde per hektaar van transaksies in elke distrik van Suid-Afrika.
* Johann Bornman is 'n ekonoom en voorsitter van Agri Development Solutions.
