Die tribunaal het reeds die samesmelting tussen Griekwaland-Wes Korporatief (GWK) en VKB Beleggings (VKB) op 21 Desember 2022 goedgekeur, kort op die hakke van ’n aanbeveling van die mededingingskommissie ten gunste daarvan.
In sy bevinding lig die tribunaal sekere kwessies oor uitgebreide verspreiding van eienaarskap uit wat aangepak moet word indien die samesmelting voortgaan. Volgens die jongste verklaring van die tribunaal sal die samesmelting en nakoming van sekere voorwaardes mense uit voorheen benadeelde gemeenskappe en sekere entiteite help om landboumarkte te betree en eienaarskap in die sektor uitbrei.
Dié voorwaardes beteken onder meer dat alle werkers uit voorheen benadeelde groepe wat in aanmerking daarvoor kom, begunstigdes van die VKB Werknemerstrust word.
VKG en GWK moet daarom verseker dat alle permanente werknemers van VKB of GWK wat vir ’n minimum van 12 maande in diens is, begunstigdes van die VKB Werknemerstrusts, by name die VKB Landbou Workers Trust of die VKB Agri Processors Workers Trust word. Dit moet binne drie maande vanaf die samesmeltingsdatum gebeur.
’n Moratorium op afleggings deur albei maatskappy gekoppel aan die samesmelting sal ook vir 36 maande vanaf instellingsdatum geld.
Albei maatskappye moet toegang tot finansiering fasiliteer aan voorheen benadeelde persone in die waardeketting en geografiese gebiede waar VKB en GWK bedrywig is. Dít sal ingevolge toepaslike kredietbeleide en relevante wetgewing oor ’n tydperk van 36 maande vanaf die instellingsdatum geskied.
Die finansiering kan insluit die fasilitering van produksielenings, maandelikse rekeninge, finansiering om toerusting te bekom en die finansiering van spesifieke projekte en/of gemeenskappe.
Die twee maatskappye is meestal werksaam in verskillende geografiese gebiede en daarom is direkte mededinging beperk. Die tribunaal het voorts bevind indien die samesmelting voortgaan, sal dit nie mededinging in enige relevante markte verhinder of verminder nie.
Daar is ook bevind die voorgestelde transaksie sal nie enige ongunstige kwessies van openbare belang raak nie.
Volgens ’n woordvoerder wat namens GWK en VKB met Landbou.com gesels het, vorder werk om aan hierdie voorwaardes te voldoen, goed.
