Boere op Limpopo se Springbokvlakte het groot verliese gely toe ’n haelbui hul vroeë aanplantings van saadmielies platgeslaan het.
“Die takseerders is nog besig om die skade te bepaal, maar afhangend van die ouderdom van die plante het boere tussen 50% en 100% van hul oeste verloor,” sê mnr. Willem Groothof van Graan SA.
Groothof, wat in die Settlers-omgewing naby Bela-Bela (Warmbad) boer, sê dié boere wat hul hele graanoes verloor het praat reeds van oorplant. Dit is nog vroeg in die vlakte se groeiseisoen en daar is nog genoeg tyd om ’n oes groot te maak as dit nou geplant word.
Hy sê die hael het in ’n strook van omtrent 5 km wyd oor 50 km uitgesak. Dele van die distrikte van Marken, Melkrivier, Vaalwater, Alma, Sterkrivier en die Modimolle (Nylstroom) en Mookgophong (Naboomspruit) het in die slag gebly.
In die Vaalwater-omgewing het steenvrugboere ook deurgeloop en baie groenteboere op die vlakte het skade gely. Daar is selfs skade op aartappel-lande in die Alma-omgewing aangemeld.
Groothof sê kort op die hael het ’n harde bui reën gevolg en op plekke het daar tot 100 mm uitgesak. Aan weerskante van die haelstrook het boere ook baie om voor dankbaar te wees. Daar het welkome reën van tussen 30 mm en 40 mm uitgesak. Hy sê na die droogte van verlede jaar is boere dankbaar vir elke druppel water.
