Vrugte-, avokado- en makadamiabome in die Levubu distrik in Limpopo het erg deurgeloop onder die somer se eerste reën- en haelbui oor die naweek.
Luidens ‘n verklaring is tot 30% van die omgewing se piesang-oes verwoes, terwyl nuut aangeplante bome erg beskadig is.
Makadamia-, avokado- en lietsjie-oeste vir volgende jaar is ook erg beskadig. Sommige boere sê die belofte van ‘n rekord lietsjie-oes in 2011 is deur dié storm verwoes. “Die avo-boere wat in 2010 swak pryse gekry het as gevolg van die Transnet-staking, het niks om in 2011 na uit te sien nie,” lui die verklaring.
Swaar haelbui
Mnr. Fanus Viviers, voorsitter van die Levubu-boerevereniging, sê die swaar haelbui het van Albasini-dam af deurgetrek tot in Levubu, en op plekke het hael so groot soos golfballe geval.
Intussen sê mnr. Stephen Hoffman, die voorsitter van die Soutpansberg Distrik Landbou Unie (DLU), hulle is wel dankbaar vir die reën wat tydens dié strom geval het. Bandelierkop het sowat 18mm gehad, terwyl Waterpoort 8mm gemeet het. Naby die Piesanghoekpad het 10mm geval, terwyl tussen 10mm en 20mm op Levubu gemeet is.
Hoffman sê hoewel dié reën nie na baie klink nie, is dit met groot dankbaarheid ontvang. Hy sê dit is die eerste keer in 15 jaar dat ‘n haelstrom soveel skade in die distrik aanrig.
26 Oktober 2010
