Suid-Afrikaners in die somerreëngebied kan nog minstens vier bogemiddeld nat maande verwag danksy die sterk La Niña-verskynsel wat nou al geruime tyd die klimaatfront oorheers.
Die kans vir vloede in dié tyd is goed in veral die Vrystaat, Noordwes, die Noord- en Oos-Kaap en selfs die suidelike deel van die Wes-Kaap, waarsku mnr. Johan van den Berg, klimatoloog van Santam Landbou.
Hy meen voorts die sterk reënval wat sedert middel Desember oor veral die oostelike dele en kol-kol in die sentrale streek geval het, behoort in die volgende twee tot drie maande na die droë westelike gebiede uit te brei.
Winterreëngebied kry ook reën
Die algemene verwagting is dat die heersende sterk La Niña teen einde Januarie kan begin verswak, maar eers teen Mei, Junie ’n neutrale stand behoort te bereik, sê Van den Berg. In die winterreëngebied kan veral die suidelike deel van die Wes- en die Oos-Kaap en die Tuinroete teen Februarie reën verwag.
Die westelike deel van die Wes-Kaap kan egter droog en warm wees. Die eerste winterreën daar kan eers laat (in Junie of Julie) verwag word. Die SA Weerdiens se jongste langtermyn-vooruitskouing dui ook op bogemiddelde reënval tot minstens April oor die grootste deel van Suid-Afrika en ondergemiddelde temperature tot minstens Mei.
Dié diens waarsku ook teen moontlike ekstreme neerslae (binne die boonste 15% van die klimatologiese rekord) op talle plekke vanaf Januarie tot Maart.
Klik hier om ons nuutste weerverslag te lees.
16 Januarie 2012
