Volgens kommentaar van Denny op Landbou.com se vrae het die onlangse onafhanklike evaluering van die perseel aangedui dat dit onveilig is weens die ernstige skade wat die brand gerig het.
“Die veiligheid en welsyn van ons mense is ons grootste prioriteit. Hoewel ons dankbaar is dat niemand weens dié ramp beseer is nie, erken en berou ons die blywende impak wat hierdie voorval op ons werknemers en hul families het.
“Om die onmiddellike las op ons mense te verlig, het ons die kommissie vir versoening, bemiddeling en arbitrasie se hulp versoek om konsultasies met ons Shongweni-personeel te bemiddel.”
Volgens Denny is al die beskikbare opsies versigtig oorweeg en het al die werknemers uiteindelik ingestem om afgelê te word sodat hulle toegang tot werkloosheidsversekering kan hê.
Business Day berig dat dié groep van 315 personeellede – van plukkers tot kantoorpersoneel en bestuurders – in Desember verlede jaar besluit het om ’n pakket te neem.
Daar is egter nog nie oor die plaas se langtermyntoekoms besluit nie aangesien dit deur verskeie komplekse faktore beïnvloed word, onder meer die vereiste vir stabiele en kostedoeltreffende kraginfrastruktuur.
“Terwyl die groep al aansienlike kapitaal in kapasiteit vir alternatiewe kragopwekking belê het, is die koste van dieselgedrewe kragopwekkers noemenswaardig.
“Ons is steeds daartoe verbind om ons belanghebbendes se belange tydens hierdie voortslepende proses te beskerm en terselfdertyd ons kliënte te bedien. Dit sluit die verskaffing van vars sampioene aan KwaZulu-Natal vanaf ons aanlegte in Gauteng en die Wes-Kaap in.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
