Die voordele van skaliegas oorskry die uitwerking wat dit op die omgewing kan hê, meen prof. Maarten de Wit, houer van die leerstoel in die wetenskap van aard-rentmeesterskap (Earth Stewardship Science) by die Nelson Mandela Metropolitaanse Universiteit (NMMU) in Port Elizabeth.
Hy het dadelik bygevoeg dat dit nie beteken dat hy die brandstofmaatskappye wat die gas wil ontgin, vertrou om hul eie bedrywighede te monitor of selfregulering toe te pas nie, of regeringsinstansies om die regte besluite te neem nie, maak nie saak hoe streng die regulerende wetgewing is nie.
Vertroue
De Wit vertrou eweneens ook nie die “vriende van die Karoo wat hulle nie vergewis van die wetenskaplike feite of dit uitdra nie” of “gegoede grondeienaars” wat nie geld beskikbaar stel om te verseker dat die geslag wat in die toekoms opgelei word in staat is om die proses te monitor nie.
De Wit, wat ’n reeks lesings oor skaliegas by die Universiteit van Kaapstad se somerskool aangebied het, sê die debat ly onder die “probleem van disinformasie” weens ’n gebrekkige begrip van die tegnologie.
Daar is ook geen omvattende ontleding van die impak wat die ontginning van skaliegas op die omgewing kan hê nie, of ’n volledige ondersoek na die menings van deskundiges nie. “Ons het baie om in te haal.”
De Wit het verder gesê daar is ook min debat oor moontlike kompromieë, naamlik of mense oor aardverwarming en koolstofbelasting besorg moet wees? “Is daar kompromieë en wat is dit? Kan ons bekostig om te wag en sake eers uit te kyk?”
Openbare debat
Wat nodig is, is meer openbare debat en onafhanklike forensiese monitering oor die ontginning van skaliegas in die Karoo deur die proses van hidrobreking.
Die Regering sal uiteindelik die finale besluit moet neem, dog De Wit het sy bedenkinge oor die Regering se vermoë om die regte besluit te neem omdat daar in regeringsgeledere bloot nie die nodige kundigheid is nie.
“Dit beteken dat ons moet staatmaak op besluitnemers in die buiteland omdat ons nie die kundiges hier oplei nie. Dis ’n bose kringloop.”
25 Januarie 2012
