Luidens SKV se nuutste nuusbrief is Van Vuuren, voormalige patoloog by die CRI, op 7 Julie op die ouderdom van 81 oorlede nadat hy geruime tyd aan kanker gely het. Hy word oorleef deur sy vrou, Bets, hul twee seuns, dogter en kleinkinders.
“Ons innige simpatie en meegevoel aan die familie, asook al die vriende en kollegas van dié saggeaarde reus wat vir so baie van ons ’n mentor was,” sê Fourie.
Fourie vertel Van Vuuren het 57 jaar in die sitrusbedryf, spesifiek sitrus-viruskunde, gewerk. Hy is internasionaal deur sy eweknieë gereken. Benewens verskeie toekennings het hy ook spesiale erkenning van die CRI ontvang wat sy sitrusverbeteringskema se kompleks in Nelspruit op 1 Junie 2017 na die Dr. Fanie van Vuuren Citrus Improvement Scheme Laboratory and Nucleus Block herdoop het.
“Behalwe vir Fanie se navorsing en diens is baie kollegas in die bedryf trots en geëerd om hom as ’n mentor te kon hê,” is daar op dié geleentheid gesê. “Vir sy eweknieë en protégés sal sy Christelike waardes, saggeaarde nederigheid, onberispelike werksetiek, wetenskaplike dissipline en onwrikbare integriteit waarskynlik sy grootste nalatenskap wees.”
Fourie sê hy het kort voor Van Vuuren oorlede is met hom gesels. Hy het Van Vuuren bedank vir die voorreg om saam met hom te werk en die feit dat hy so ’n goeie mentor was.
“Dit was my werk, maar dit was ’n plesier,” was Van Vuuren se antwoord en groet.
