Die Polisie in Limpopo is op soek na drie verdagtes ná ’n boer van Letsitele Donderdag (12 Julie 2012) by sy plaasstal geskiet is. ’n Verbyganger het gesien hoe een van die boer se werkers, wat die plaasstal waar hoenders verkoop word beman het, deur drie mans aangeval en aangerand word.
Kol. James Ngoepe, woordvoerder vir die Polisie, sê mnr. Lappies Labuschange is in kennis gestel van die voorval, en het die werker te hulp gesnel. “Met sy aankoms op die toneel, is Labuschange deur ’n koeëlreën begroet, en hy is op verskeie plekke gewond.”
Die drie verdagtes het op die vlug geslaan met ’n onbekende hoeveelheid kontant en selfone. Mnr. Kobus Naudé, eienaar van Northern Security, sê Labuschange is in ’n ernstige toestand in ’n hospitaal in Polokwane waar hy vandag (13 Julie 2012) geopereer sal word.
Skedel
“Ek het vroeër met sy dokter gepraat. Hy is volgens die dokter een keer in die kop geskiet, maar hy is oukei. Die koeël sit glo aan die kant van sy skedel,” vertel Naude.
Ngoepe sê hulle vra enige lid van die publiek wat die Polisie met inligting oor die voorval kan voorsien, om kol. James Espag by 082 451 7169 te bel.
Intussen probeer die Polisie ook inligting bekom ná ’n boer Maandag (9 Julie 2012) op die liggaam van een van sy plaaswerkers in die Retavi-omgewing naby Tzaneen afgekom het. Die man, wat aan twee skietwonde beswyk het, se liggaam is langs die pad gevind.
Ngoepe sê dit is tans onduidelik wat gebeur het, want op die tyd van die moord was daar geen hoenders op die plaas om te verkoop nie. Niks is ook gesteel nie.
