Mnr. Ebrahim Patel, minister van handel, nywerheid en mededinging, het ’n aanbeveling deur die kommissie vir internasionale handelsadministrasie (Itac) aanvaar dat teenstortingstariewe ingestel moet word, maar het die inwerkingtreding daarvan opgeskort, het mnr. Anthony Clark van Smalltalkdaily Research, ’n ontleder van onder meer genoteerde voedselmaatskappye, vroeër vandag gesê. Die skoknuus is volgens hom vanoggend in die Staatskoerant afgekondig.
Itac het in Desember verlede jaar voorlopig bevind dat hoenderstukke aan die been uit Brasilië, Denemarke, Ierland, Pole en Spanje plaaslik gestort word en tot wesenlike skade vir die plaaslike bedryf lei. Die kommissie het toe voorlopige teenstortingstariewe van 3% tot 265% vir ses maande ingestel.
Die tariewe het middel Junie verval en die plaaslike pluimveebedryf het sedertdien gewag om te hoor wat Patel se besluit oor finale tariewe sou wees. Patel het 60 dae gehad om sy besluit bekend te maak.
“Ons weet nou hoekom daar ’n vertraging was,” skryf Clark in ’n e-pos. “Straftariewe is vir 12 maande opgeskort. Dié nuus sal nie goed deur plaaslike pluimveeprodusente ontvang word nie, omdat invoer vir ’n groot deel van 2022 gestyg het, ondanks die (voorlopige) teenstortingstariewe en die swakker rand.”
Luidens die Staatskoerant, wat Clark by sy e-pos ingesluit het, het Patel Itac se aanbeveling goedgekeur. Die minister het egter die huidige skerp styging in voedselpryse in die Suider-Afrikaanse Doeane-unie en wêreldwyd in ag geneem en die beduidende uitwerking wat dit veral op arm mense het. Hy het daarmee tesame ook die uitwerking in ag geneem wat die instelling van teenstortingstariewe op die prys van hoendervleis, een van die bekostigbaarder proteïenbronne, kan hê.
