Hoenderproduksie is weer in die kollig na bewerings van hoenders wat in haglike toestande in Mpumalanga aangehou word.
Luidens ’n berig in Rapport het ’n oud-werknemer van Fairacres se Kendal-plaas naby Ogies foto’s wat sowat ’n jaar gelede geneem is, aan die koerant beskikbaar gestel.
Volgens die koerant wys die foto’s henne in oorvol hokke wat mekaar vertrap en kannibaliseer. Karkasse word glo ook gelos om te ontbind. Foto’s van eiers wat aan dooie henne of in hoendermis vassit en so met vervoerbande na die pakhuis gaan, is glo ook geneem.
Die koerant se bron beweer tussen 100 en 200 hoenders vrek daagliks op die plaas, en dat net een werker na 40 000 hoenders moet omsien. Dié hoenders word almal in klein hokkies binne ’n groot hoenderhok aangehou.
’n Tweede bron beweer dat van die eiers wat ná hul vervaldatum na die plaas teruggestuur word, weer in die produksielyn ingesluit word.
Die koerant het die plaas verlede week saam met die Dierebeskermingsvereniging besoek, en volgens die berig is ’n verslag aan mnr. John Byrne, direkteur van Fairacres, gegee.
Bron: Rapport
21 Mei 2012
