Die Johannesburgse Arbeidshof het Dinsdag, 16 November, teen dr. Andile Dyasi beslis aangaande ‘n hofsaak oor dissiplinêre optrede teen hom, sê Onderstepoort Biologiese Produkte (OBP).
Dyasi is die afgedankte uitvoerende hoof van die OBP.
Adv. Dave Mitchell, nie-uitvoerende direkteur van die OBP-raad, sê die hof het die raad ondersteun in die uitvoering van sy pligte.
“Wat die regter bevind het, is dat die raad nie net die reg het om Dyasi te skors en dissplinêr teen hom op te tree nie, maar dat die raad ‘n plig het om die sake van die maatskappy te bestuur”.
Regter Robert LaGrange het in sy bevinding ook opgemerk dat dié saak in die Suid-Afrikaanse Wet Indeks vervat moet word, en dat dit binne regskringe gesirkuleer moet word vir die belang van ander regters.
Dyasi het vroeër ‘n saak teen me. Tina Joemat-Petersson, die Minister van Landbou, Bosbou en Visserye en die OBP raad aanhangig gemaak, waarvolgens hy eis dat nét die Minister en nie OBP raad nie, teen hom mag optree.
Hof se beslissing
Mitchell sê die Minister het in die hofdokumente gesê dat sy by die bevinding van die hof sal berus. Net die Minister is by magte om Dyasi af te dank. Die raad het na dissiplinêre optrede teen Dyasi ‘n versoek vir sy afdanking aan die Minister gestuur. Die hof se beslissing is aan haar gestuur.
Die Parlementêre oorsigkomitee vir Landbou, Bosbou en Visserye, wat vroeër hulle ontevredenheid met Dyasi uitgespreek het, het aan die Minister aanbeveel dat sy teen 26 Oktober 2010 moes besluit of sy Dyasi gaan afdank. Indien sy teen sy afdanking sou besluit, moes sy redes daarvoor verskaf.
Die klagtes teen Dyasi sluit geldelike wanbestuur in.
Volgens Mitchell het Dyasi se regspan glo reeds aangedui dat hulle appèl wil aanteken teen Dinsdag se hofbevel. Hy sê sou die aansoek om appèl voortgaan, sal die OBP dit teenstaan op grond van koste.
“As so ‘n appèlsaak sou plaasvind, beteken dit Dyasi kan langer aanspraak maak op ‘n salaris en voordele,” verduidelik Mitchell.
18 November 2010
