Suid-Afrika se wildbedryf is gereed om die departement van bosbou, visserye en omgewingsake in die hof te pak oor nuwe regulasies vir bedreigde of beskermde spesies (Tops) wat op 1 April in werking tree. Die bedryfsliggaam vir wildboere, WRSA, sê die departement konsulteer al sedert 2011 met die bedryf oor hierdie regulasies en insette van wildboere word in elke weergawe van die nuwe stel regulasies geïgnoreer.
Die nuutste stel regulasies maak byvoorbeeld net voorsiening vir die wildbedryf in twee vorme, naamlik ekstensiewe stelsels of beheerde omgewings. Ingevolge die regulasies kan ’n wildplaas nou net as ekstensief beskou word wanneer daar geen menslike ingryping plaasvind nie.
“Dit sal beteken mens verloor jou ‘ekstensiewe’ status as jy byvoorbeeld tydens ’n droogte vir jou wild voer uitsit, water aanlê, aanvullende lekke uitplaas of stappe doen om jou wild teen roofdiere te beskerm. Jy moet dus jou wildplaas soos ’n nasionale park bestuur en die natuur sy gang laat gaan,” sê mnr. Richard York, uitvoerende hoof van WRSA.
