Honderde gems- en springbokke het in die Richtersveld Natuurreservaat verdrink met die Oranjerivier in vloed, sê me. Jolandé Pretorius, ‘n inwoner van die omgewing.
Pretorius sê hoewel die gemeenskap van Alexanderbaai al vir drie weke lank weet dat “die groot water op pad is”, het natuurbewaring glo geen stappe geneem om te verseker die bokke na hoërliggende gebiede beweeg nie.
Volgens Pretoruis kon veral gemsbokke sedert Vrydag (14 Janaurie) vasgekeer op eilandjies in die rivier gesien word soos die rivier se vlakke geleidelik gestyg het. “Ek het spesifiek drie gesien. Eers het hulle al drie net op die eiland gestaan, later kon jy net twee se rûe sien, en toe’s hulle weg. Die derde bok is kort daarna ook weg in die water.”
Pretorius vertel dat hoewel lede van die gemeenskap die diere wou red, dit toe te laat en te gevaarlik was om met ‘n boot op die rivier te vaar.
Na verwagting sal die rivier se vlak vandag (18 Januarie) sy piek bereik. Pretorius sê die rivier se walle is reeds oorstroom en skade is plek-plek aangerig, maar die skade is nie so groot soos hoër op in die rivier nie.
Kyk gerus na ‘n fotogalery van die oorstromings en die bokke in die gebied. Pretorius het die foto’s aan Landbou.com verskaf.
18 Januarie 2011
