Sy raad aan die Regering is om op te hou praat, en begin om dit wat verkeerd geloop het, reg te stel, het dr. Roelof Botha, ekonoom, op Mosselbaai by die graanhanteringsorganisasie van Suider-Afrika (Gosa) se jaarlikse simposium gesê.
"Suid-Afrika se probleme is op die mikrovlak, want elke protes-aksie kan jy terugspoor na ’n geografiese gebied waar beloftes oor infrastruktuur of dienste gemaak is, en nie nagekom is nie. Dit kan reggestel word met die regte vaardighede en daar is so baie pragmatiese maniere om dit te doen. Baie geld is beskikbaar."
Botha meen genoeg redes bestaan om die land se beleggingstatus af te gradeer. Hy noem die "fiasko" oor energiebeleid wat daartoe gelei het dat elektrisiteitstariewe in drie jaar met 100% verhoog is, probleme met die uitbetaling van staatstoelaes, staatskaping, soos uitgewys in die vorige Openbare Beskermer se verslag, die onbekwaamheid wat tot ’n verlies van R14,5 miljard by PetroSA gelei het en ongeoorloofde besteding van R14,8 miljard by munisipaliteite. "Ons is besig om die wrang vrugte van kaderontplooiing te pluk."
Onbekwaamheid in staatsgeledere
Tog glo Botha dat hoewel die onbekwaamheid in staatsgeledere die groeipotensiaal van die ekonomie kan strem, die president en sy "trawante" nie Suid-Afrika se ekonomie ter waarde van R4,4 biljoen in resessie kan dompel nie.
Daarbenewens het die primêre landbousektor sedert 2013 ’n oorskot van R91 miljard op die handelsbalans, terwyl die sekondêre landbousektor ’n oorskot van R39 miljard geproduseer het.
Eweneens toon Agbiz se onlangse vertrouensindeks dat sakemense se vertroue in die ekonomie verbeter het. Botha het gesê dis belangrik om die gunstige ontwikkelinge wyer bekend te maak.
