Die samesmelting van Taurus en die Franse veegenetika-groep, Evolution, beteken hoofsaaklik dat plaaslike genetika weer sy regmatige plek in die Suid-Afrikaanse suiwelbedryf kan herwin.
Dr. Pierre van Rooyen, hoofbestuurder van SA Stamboek, het die samesmelting van dié twee maatskappye verwelkom. “Ons het plaaslik uitstekende genetika, maar die wanopvatting het die afgelope jare bestaan dat die saad van meederwaardige suiwelbulle slégs in die buiteland verkry kan word. Ons vertrou dat dié samesmelting kan meehelp om die plaaslike stoetbedryf ’n hupstoot te gee,” sê Van Rooyen.
Mnr. Charl Hunlun, Stamboek se bestuurder van beroepsdienste, het die sakegeleenthede van die nuwe onderneming ook verwelkom. Hy verwelkom onder meer die gesonde mededinging in die markplek wat kan veroorsaak dat bekostigbare semen aan boere beskikbaar gestel kan word. “Taurus is lank reeds nie meer ’n koöperasie nie en sy voormalige boere-lede het ander diensverskaffers begin ondersteun,” sê hy.
Die grootste verkope van semen is aan kommersiële melkboere.
* Madame Elizabeth Barbier, Frankryk se ambassadeur in Suid-Afrika, het die vestiging van die nuwe landbou-entiteit Taurus Evolution geloof as ’n toonbeeld van die versterking van handelsbande op die gebied van die landbou tussen haar tuisland en Suid-Afrika.
Sy het die belegging van die Franse groep Evolution in Suid-Afrika en onregstreeks in Afrika beskryf as ’n onderskrywing van die vertroue in die ekonomiese groeipotensiaal van die Afrika-vasteland en die nakoming van sy maatskaplike verantwoordelikheid om die genetiese potensiaal van die proteïenbronne van die Afrika-bevolking te verbeter.
Gevestigde Franse suiwelmaatskappye in die land is Danone en Parmalat, terwyl die In Vivo-groep veevoer in Brits en Oos-Londen vervaardig, asook Virbac en Merial, die verspreiders van veemedisyne.
