Rolspelers in die koringbedryf gaan vroeg in 2017 indabas hou om oor vordering met herlewingsprojekte vir dié bedryf te praat.
“Die hele bedryf beleef moeilike omstandighede, nie net boere nie,” sê me. Mariana Purnell, hoofbestuurder van Agbiz Grain. Sy was een van die sprekers by Agbiz se vooruitskouing vir 2017.
“Die oorlewing van die plaaslike koringbedryf is vir die hele waardeketting belangrik, van die produsent tot die verwerker, sowel as vir die verbruiker. Verskeie veranderinge is vanjaar gemaak om boere te help om koring meer volhoubaar te produseer en om aan ander kwessies in die waardeketting aandag te gee.”
Elsenburg en Pretoria
Agbiz Grain sal die indabas op 17 Februarie in Pretoria en 21 Februarie by Elsenburg in Stellenbosch aanbied. Dit sal daarop toegespits wees om inligting te gee oor veranderinge wat gemik is op die herlewing van die bedryf, asook oor nuwe regulatoriese vereistes wat 'n invloed op die bedryf het.
Purnell het gesê die laaste 20 jaar het vereistes vir kultivarvrystellings slegs op gehalte gefokus, wat die oorlewing van die plaaslike bedryf bedreig.
* Mense wat belangstel om die indabas by te woon, kan by die Agbiz Grain-kantoor bespreek, tel. 012 807 3002.
