Sowat 22 ton cheddarkaas wat van Ierland af ingevoer is, is deur Hawe-Gesondheidsowerheid in Durban afgekeur omdat dit E-coli op gehad het, sê die Melkprodusente-organisasie.
Mnr. Bertus de Jongh beskou dié stap as ‘n deurbraak vir die plaaslike bedryf wat deur dié invoere benadeel word.
De Jongh sê Suid-Afrika voer baie jare lank al kaas van Ierland af in teen lae pryse. Hy sê hy het al verskeie klagte aanhangig gemaak omdat verwerkers kla dat supermarkte sê hulle hoef nie plaaslike pryse te aanvaar nie, omdat hulle goedkoper produkte van Ierland af kan invoer. Sodoende word die plaaslike pryse van produkte afgedruk, wat op die ou end ‘n invloed op die boer se inkomste het.
“Ons beskou hierdie voorval as ‘n deurbraak vir die plaaslike bedryf, waarbinne dinge tans baie druk gaan. Boere sukkel met plaaslike pryse wat net nie wil styg nie, en dit is dié jaar spesifiek weens kaas wat pryse laag bly,” aldus de Jongh.
SA dalk stortingsterrein?
De Jongh sê dit was vir die Regering tot dusver baie moeilik om teen dié invoere op te tree, omdat die hoeveelhede net onder die perk gehou word waar die Regering mag optree. “Ons vermoed ons mark word as ‘n stortingsterrein vir die goedkoop produkte beskou, want só ‘n voorval het in die middel van die jaar ook gebeur.”
Tydens die onlangse voorval is die Hawe-Gesondheidsowerheid gevra om beslag te lê op ‘n besending kaas afkomstig uit Ierland. Die MPO het Agri Inspec opdrag gegee om verder ondersoek in te stel. Monsters van die kaas is ontleed, en E-coli-bakterieë is daarop gevind. Dié resultate is bevestig deur onafhanklike toetse wat op versoek van die uitvoerder gedoen is.
Die Suid-Afrikaanse owerhede het besluit om die produkte te vernietig. De Jongh sê hoewel dié voorval nie invoere uit Ierland sal stopsit nie, sal dié invoere in die komende maande wel baie deeglik nagegaan word.
Koop Suid-Afrikaans
Na aanleiding van dié gebeure versoek die MPO verbruikers om plaaslike produkte te koop aangesien ingevoerde produkte dikwels nie aan Suid-Afrikaanse veiligheid- en gehaltestandaarde voldoen nie.
Volgens De Jongh beskou hulle die gebeure in ‘n ernstige lig vanweë die gesondheidsrisiko’s betrokke, asook die potensiële skade wat dit aan die bedryf se beeld kan doen. Hy versoek verbruikers om die cheddarkaas wat hulle koop, se etikette deeglik na te gaan om seker te maak dit is van plaaslike oorsprong. “Die MPO het reeds die betrokke owerhede versoek om in die toekoms nie Ierse suiwelinvoere toe te laat alvorens die veiligheid daarvan bevestig is nie.”
9 November 2011
