Een van die wêreld se mees gesaghebbende wynkundiges en die eerste Suid Afrikaanse voorsitter van die internasionale Institute of Masters of Wine, me. Lynne Sheriff, is een van die Veritas-beoordelaars.
Vanaf 13 tot 20 September word 1 732 wyne en brandewyne by die Nederburg Veilingskompleks in die Paarl beoordeel vir ‘n handjievol dubbelgoud en goue Veritas-medaljes.
Sheriff, ‘n Suid-Afrikaanse wynkonsultant wat in Brittanje woon, het pas die leisels oorgeneem as leier van dié prominente wynorganisasie met sy hoofkantoor in Engeland. Sy is lid van die panele wat die Shiraz en Méthode Cap Classique wyne te beoordeel.
Die Veritas-toekennings vier vanjaar ‘n besonderse mylpaal, naamlik twee dekades as die land se voorste kompetisie vir kwaliteit markklaar wyne. Brandewyn is nou ook deel van die Veritas-toekennings en 40 top brandewyne is vanjaar ingeskryf.
Meeste inskrywings is Shiraz
Shiraz, met nie minder nie as 206 inskrywings is ‘n kortkop voor Sauvignon Blanc met 196 inskrywings. Ander rooi kultivars soos Cabernet Sauvignon (149) en Pinotage (126) volg kort op hul hakke.
Die beoordelingspanele bestaan uit sewe beoordelaars uit die geledere van plaaslike wynmakers, navorsers, akademici, Kaapse wynmeesters, wynjoernaliste en -konsultante, en word aangevul deur die kundigheid en ervaring van die vyf internasionale wynkenners. Die jaarlikse insluiting van internasionale kundiges het ten doel om te verseker dat die beoordelingsproses en uitslae onpartydig is en internasionaal erken word.
Die res van die buitelandse span bestaan uit Thomas Lüber van Duitsland, die Australies-gebore wynmaker Richard Rowe en die Franse brandewynkenner, Denis Lahouratate. Dave Hughes, ‘n plaaslike veteraan-beoordelaar en stigter van die Kaapse Wynakademie, dien as leier van verskeie proe-panele.
Brandewyn ingeskryf
Die 40 brandewyninskrywings is inderdaad in goeie hande met Denis Lahouratate en Dave Hughes aan die hoof van die beoordeling.
Duimpie Bayly, die Veritas-voorsitter, verduidelik dat tien wyne op ‘n keer ‘blind’ geproe word. “Individuele beoordelaars ken punte toe gebaseer op ‘n internasionale 20-punt skaal, waarná hierdie punte bespreek en konsensus bereik word,” sê hy. “Dubbelgoud word toegeken aan ‘n wyn wat 18 en meer punte kry, terwyl 17 punte nodig is vir die goue Veritas simbool. ‘n Silwer plakker pryk op wyne met 16 punte en brons op dié met 15 punte.
Vanjaar se gunstelinge word op 8 Oktober tydens ‘n glansdinee, geborg deur Agri-Expo, by die Kaapstadse Internasionale Konferensiesentrum (KIKS) bekend gemaak.
Volledige inligting oor die verskeie publieke proeë van die dubbelgoud en goud medalje wenners wat landwyd gehou word is beskikbaar op die webtuiste www.veritas.co.za.
14 September 2010
