“As jy die teelaarde het vir politieke onbestendigheid wat veroorsaak word deur dinge soos armoede, swak ekonomiese groei, hoë brandstofpryse, skaars hulpbronne en korrupsie dan kan dit tot ’n uitbarsting lei, veral as die regering nie werklik in beheer is nie.”
Hy sê die omstandighede wat ’n jaar gelede tot die onluste in KwaZulu-Natal aanleiding gegee het, is steeds aanwesig in Suid-Afrika en selfs nou meer intens met die verhoogde brandstofpryse, stygende kospryse en die hoë prys van kookolie. “Ons het ’n baie hoër konflikpotensiaal nou as ’n jaar gelede.”
Hy wys daarop dat die onluste in Sri Lanka presies ’n jaar ná die konflik in KwaZulu-Natal begin het. Hy sê die verskil tussen Suid-Afrika en Sri Lanka is dat daar ’n groot verskeidenheid plekke in Suid-Afrika vir optogte is. “Gaan dit die Uniegebou wees, of die parlementsgebou, of Phala Phala of die Grondwethof? Dit is baie moeiliker om hier te besluit wat is eintlik die sentrum van mag. In Sri Lanka is dit maklik. Dit is bloot die paleis waarin die staatshoof woon.”
