Die Moerkwekers van 2010-toekenning het by die BayerCropScience gala-dinee aan kwekers van Ivanhoe Farming Company gegaan.
Mnre. John Campbell en Paul Pringle het met dié gesogte titel weggestap. Campbell het in sy toespraak gesê enige van die finaliste kon met die prys weggestap het weens die hoogstaande gehalte van aartappelmoere wat geproduseer word. “Dit maak dit vir ons ‘n baie groot eer om as Moerkweker van die Jaar aangekondig te word.”
Volgens Pringle is die prys soortgelyk daaraan om Springbok-klere in moerkweek te kry. Ivanhoe Farming Company volg ‘n ses tot sewe jaar rotasieplan en plant jaarliks 200 ha aartapelmoere. Die moere word met die hand geplant en hulle mik vir ‘n plantestand van 50 000 plante per ha met ‘n minimum van 200 000 halms per ha.
Die trots van Ivanhoe Farming Company se besigheid word weerspieël in die ingesteldheid en bydraes van die mense wat vir hulle werk en wat tot ’n groot mate tot hulle sukses bydra. Wanneer Ivanhoe Farming Company gevra word waaraan hulle hul sukses toeskryf, is die antwoord eenvoudig: Doen net die basiese beginsels reg.
Die Aartappelsertifiseringsdiens se databasis plaas al die moerkwekers outomaties in ’n rangorde volgens die prestasie van die aartappelmoere wat hulle gesertifiseer het. Alle aartappelmoerkwekers wat 30 ha en meer onder die Suid-Afrikaanse Aartappelmoersertifiseringskema registreer, kom outomaties in aanmerking vir hierdie toekenning. Jaar tot jaar verbetering word ook in ag geneem.
Vanjaar is die sesde jaar wat die toekenning gemaak is.
7 Oktober 2010
