Die kollig skyn skerp op me. Tina Joemat-Pettersson, Minister van Landbou, Bosbou en Visserye, nadat dit bekend geword het dat ’n familielid van haar by die Departement van Landbou, Bosbou en Visserye werk.
Me. Rowena Joemat, glo ’n kleinniggie van Joemat-Pettersson, werk as waarnemende direkteur vir ontwikkelingsondersteuning vir programme by dié departement.
Parlementêre vrae oor die aanstelling van ’n familielid van Joemat-Pettersson gaan nou gestel word nadat mnr. Salam Abram, ANC-LP, by ’n sitting van die portefeuljekomitee oor landbou, bosbou en vissery gevra het of Joemat familie van die Minister is.
Mnr. Langa Zita, direkteur-generaal van die departement, het bevestig dat hulle familie is en bygevoeg dat sy “die beste amptenaar is wat hy in sy departement gekry het”.
Sy was voorheen werksaam by die Landbounavorsingsraad, waarna sy in Maart 2008 by ontwikkelingsondersteuning by die departement aangesluit het. Sy het ’n meestersgraad in die landbou. Landbou.com het vasgestel dat sy Joemat-Pettersson se kleinniggie is.
Mnr. Selby Bokaba, die minister se woordvoerder, het gesê dat Joemat gekwalifiseer is en die kennis het om ontwikkelingsondersteuning te bied.
“Die vraag moet gevra word as iemand se van dieselfde is, of die persoon dan nie ’n betrekking by die Regering mag kry nie.” Hy het ook daarop gewys dat Joemat reeds in 2008 by die departement aangesluit het, terwyl Joemat-Pettersson eers in Mei 2009 die Minister van Landbou, Bosbou en Visserye geword het.
Me. Annette Steyn, DA-LP, het luidens ’n verklaring aangedui dat die jaarlikse pakket van ’n direkteur tot soveel as R790 950 is. Sy het aangedui dat sy in die Parlement vrae oor die aanstelling van Joemat-Pettersson se kleinniggie sal vra.
9 Februarie 2012
