Onduidelik heers hoe die bedrag van R2,5 miljard vir droogtehulp saamgestel is wat pres. Jacob Zuma in sy staatsrede aangekondig het.
Zuma het aangedui dat die Regering R2,5 miljard bewillig het vir veevoer, water, infrastruktuur, boorgate en ander ingrypings.
Agri SA het die bedrag bevraagteken en versoek dat ’n duidelike uiteensetting beskikbaar gemaak moet word van die geld wat bewillig is.
Hulp vir boere in droogte
Volgens die Regering se interministeriële taakspan wat met die droogte belas is, is die hulp om boere se nood in droogtegeteisterde gebiede te verlig, oor verskeie programme versprei.
Me. Edna Molewa, Minister van Omgewingsake, het vroeër aangedui dat binne die werk vir vuur program nagenoeg R1,3 miljard is om boere te ondersteun.
Verder het die taakspan aangedui dat die Departement van Landbou, Bosbou en Visserye gedurende die 2015/’16 geldjaar R268 miljoen deur sy omvattende steunprogram vir die landboubou beskikbaar gestel het, provinsies het R173 miljoen bygedra om veevoer en voorraad vir boere aan te skaf. Die Departement van Landelike Ontwikkeling en Grondhervorming het ook R286 miljoen vir droogtehulp onder sy herkapitaliserings- en ontwikkelingsprogram beskikbaargestel. Die Land Bank het ook in dieselfde jaar R500 miljoen se konsessielenings aan kommersiële boere beskikbaar gestel.
Geen idee waar syfers vandaan kom
Mnr. Christo van der Rheede, adjunk-uitvoerende direkteur van Agri SA, sê hulle het steeds geen idee waar die president aan die syfer kom nie.
“Sover ons weet is net meer as R200 miljoen aan provinsies oorhandig vir droogtehulp. Die hartseer hiervan is dat provinsies, soos die Noord-Kaap, eers in Februarie vanjaar hulle droogtehulp kon spandeer, terwyl die droogte eintlik al oor is.”
Verslae wat die organisasie vanuit die provinsies gekry het, dui aan dat geld nie doeltreffend aangewend was nie. “Die staat het skaars die kommersiële boere gehelp. Dit is hartseer want dit is die voedselvoorsieners van die land en hulle is belastingbetalers en groot werksverskaffers.
Blatant teen kommersiële boere gediskrimineer
“Waarom blatant teen kommersiële boere gediskrimineer word gaan ons verstand te bowe.” Hy het ook gesê dat hulle vermoed dat die geld wat die Land Bank vir meestal produksielenings en herkapitalisering bygetel is as hulp vir droogteverligting.
Van der Rheede het aangedui dat Agri SA besig is om sy eie rampbestuursplan saam te stel om gereed vir komende droogtes en vloede te wees.
* Intussen is me. Annette Steyn, die DA se skaduminister van landbou, op soek na die staat se vermiste boorgate. Lees die berig hier.
