Dr. Ernest Mussina, waarnemende voorsitter terwyl mnr. George Steyn op reis is, het gesê 99,99% van die aandeelhouers wat gestem het, het ten gunste van die naamverandering gestem.
Dié naamverandering weerspieël die maatskappy se groei en uitbreiding buite die grense van die landboubedryf en die Wes-Kaap oor die afgelope jare.
“Die naam Kaap Agri was deur die jare gepas, aangesien die onderneming se wortels in die landbou was, veral in die Wes-Kaap. Dié landbou- en geografiese verwysings hou egter sekere beperkings in,” het mnr. Sean Walsh, uitvoerende hoof van KAL Groep, verduidelik.
“Die afgelope sewe jaar het ons ’n doelbewuste diversifikasiestrategie gevolg. Die onderneming het ’n meer gediversifiseerde groep geword met handelsaktiwiteite reg oor Suid-Afrika en Namibië wat oor verskeie bedrywe strek.”
Walsh het getoon dat 34% van die maatskappy se inkomste uit brandstof kom, 30% uit geriefskleinhandel, 20% uit die landbou en 16% van algemene kleinhandel.
Hy glo die nuwe naam is ’n beter weerspieëling van dié diversifikasie, wat die area en bedrywe betref waarin die onderneming sake doen.
Die nuwe naam sal ook groter bewustheid onder die beleggingsgemeenskap skep, glo hy. Die maatskappy is in 2017 op die Johannesburgse Effektebeurs genoteer.
“Ons glo die nuwe naam dui op die rigting waarheen die maatskappy op pad is, maar terselfdertyd respekteer dit ook die maatskappy se wortels,” meen Walsh.
111 jaar oud
Kaap Agri het sy ontstaan in 1912 in die Swartland gehad toe ’n groep boere kragte saamgesnoer het om guano te koop vir hul eie boerderye, maar ook om as bemesting te verkoop. Dié koöperasie het wyd bekend geraak as WPK Landbou in 1995. Kaap Agri is ná ’n aantal samesmeltings gevorm.
Vandag neem die onderneming altesaam 6 752 mense in diens en hy het meer as 270 bedryfseenhede reg oor Suid-Afrika en Namibië. Hy het bykans 33,3 miljoen transaksies in die afgelope boekjaar beklink. Met die nuwe Peg-toevoeging (brandstof- en geriefswinkels) verwag hy om meer as 5 miljoen transaksies per dag te doen.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
