Die voorloper van die veelbesproke minister van elektrisiteit en gunsteling in die media, dr. Kgosientsho Ramokgopa, is wel aangewys in dié pos. Hy was tot dusver hoof van beleggings en infrastruktuur in die presidensie, en was tussen 2010 en 2016 burgemeester van Tshwane.
“Die aangestelde minister sal politieke gesag en beheer hê van alle aspekte van die energie-aksie-aanleg,” het Ramaphosa gesê.
Nadat die aanstelling ’n paar keer uitgestel is, het Ramaphosa Maandagaand gesê hoewel die aantal ministeries op kort termyn sal vermeerder, word daar gewerk om die grootte van die regering te rasionaliseer en dus sal die aantal ministeries in die toekoms verminder word.
Dr. Nkosazana Dlamini-Zuma is een van die ministers wat na ander departement geskuif het, en sal nou dien as minister in die presidensie vir vroue, kinders en mense met gestremdhede.
Nog skuiwe sluit in mnr. Sihle Zikalala, minister van openbare werke, wat ook vroeër as LP ingehuldig is. Die nuwe minister van sport is mnr. Zizi Kodwa.
Die minister in die presidensie verantwoordelik vir prestasie, monitering en evaluering is me. Maropene Ramakgopa en me. Patricia de Lille is die nuwe minister van toerisme, wat beteken die omstrede me. Lindiwe Sisulu is haar pos kwyt.
Nog ’n bevordering vir ’n adjunkminister is me. Sindisiwe Chikunga, wat nou by mnr. Fikile Mablula as minister van vervoer oorneem.
Me. Ayanda Dlodlo, voormalige minister van staatsdienste en administrasie, het al verlede jaar bedank en me. Noxolo Kiviet, is nou die nuwe minister van dié staatsdepartement.
