Verskeie kalk-ondernemings in Noordwes en Gauteng word tans deur die Mededingingskommissie ondersoek.
Luidens ‘n verklaring deursoek die kommissie tans die terreine van H.Pistorius & Co (Pty) Ltd, Kalkor (Pty) Ltd, Plaaslike Boeredienste (Pty) Ltd, Fertiliser Association of South Africa (FSSA) en Grasland Ondernemings (Pty) Ltd.
Dié ondernemings is vervaardigers of verspreiders van onder andere dolomitiese en kalsitiese landbou-kalkprodukte, wat oor die algemeen aan boere verkoop word. Dié ondersoek vorm deel van die kommissie se ondersoek na kleinhandelprysbeheer, prysknoeiery en marktoekenning binne die landbou kalk-mark.
Verwelkom
Intussen sê Graan SA hy verwelkom enige ondersoeke wat die land se markte meer mededingend maak. Dr. Kobus Laubscher, die uitvoerende hoof, glo Suid-Afrika se markte moet mededingend wees, want dit sal tot die voordeel van alle rolspelers wees.
“Ons is nie daarop uit om te vervolg nie, ons glo net dat alle markte mededingend moet wees. Ons hoop dat die kommissie se ondersoek so spoedig as moontlik afgehandel sal wees, want as hulle op nie-mededingende praktyke afkom, dit so gou moontlik gestop kan word en sake na normaal kan terugkeer.”
Volgens afdeling 48 van die Mededingingswet het die kommissie die reg om ‘n terrein te betree en te deursoek, én om beslag te lê op dokumentasie wat deel kan vorm van ‘n ondersoek. Die wet gee ook aan ‘n regter of landdros die reg om ‘n lasbrief aan die kommissie uit te reik om ‘n terrein te betree en te deursoek.
19 November 2010
