Plaaslike sitrusboere in gebiede waar swartvlek voorkom, kan dalk eersdaags hul produkte ook na Amerika uitvoer.
Amerika se departement van landbou (USDA) het in Augustus 'n voorstel gepubliseer vir die verandering van die reël wat invoer uit Suid-Afrika se swartvlekgebiede verbied.
Die Amerikaanse landbouminister se raadgewer vir landbou in Afrika suid van die Sahara, mnr. Eric Wenber, en dié land se landbou-amptenaar vir die streek, mnr. Russel Duncan, het sitrusboere in Letsitele besoek waar hulle boorde besigtig het en 'n inligtingsvergadering gehou het.
Duncan het gesê boere kan die USDA se webwerf besoek waar die voorskrifte vir die verskuiwing van sitrus uit Florida – waar swartvlek voorkom – na ander gebiede uitgespel word. Dit sal Suid-Afrikaners 'n idee gee hoe die Amerikaanse regering oor swartvlek dink, het hy gesê.
Wenberg het daarop gewys dat daar weinig groei in die Europese mark is. Hoewel Wes-Kaapse sitrusboere reeds na Amerika uitvoer, was boere in streke waar swartvlek voorkom, tot op hede aangewese op die Europese Unie vir 'n uitvoermark.
Mnr. Ben Vorster, direkteur van die SA Sitruskwekersvereniging vir Letsitele, sê egter ander lande in suidelike Afrika voer sonder enige vrae of beperkinginge sitrus uit swartvlekgebiede na Europa uit. Hy verwelkom die moontlikheid van 'n alternatiewe uitvoermark in Amerika.
Wenberg het gesê Suid-Afrikaners moet veral die mark vir lemoensap in gedagte hou wanneer hulle na die Amerika wil uitvoer. "Die vraag oorskry die aanbod by verre," sê hy.
Wenberg sê Amerika gaan oor die volgende 12 maande baie sitrus moet invoer.
Ongelukkig is daar geen duidelikheid hoe gou die swartvlekreël vir Suid-Afrika se produkte kan verander nie. "Ons moet elke voorstel op die verandering van die reël in ag neem en eers wanneer ons deur al die voorstelle gewerk het, kan ons 'n besluit neem," het Duncan aan boere gesê.
