Die verdagtes, mnre. Kamohelo Motankisi (34) en Lerato Selepe (22), is laat Vrydag langs ’n pad net buite die Bohlokong-township in hegtenis geneem in verband met die moord op me. Sesi Smit, haar 16-jarige seun, Rhudie, en vyf vroulike plaaswerkers.
Mnr. Alheit Smit, Sesi se man, het op die slagoffers se lewelose liggame in hul plaaswoning op die plaas Lismore afgekom. Netwerk24 berig dat die slagoffers in die huis oorval, geskiet en met messe gesteek is. Rhudie is in die bad verdrink.
Brig. Motantsi Makhele, polisiewoordvoerder, het aanvanklik aangedui dat die verdagtes op sewe klagte van moord, gewapende roof en die onwettige besit van vuurwapens aangekla word. Met die verdagtes se verskyning in die Kestell-landdrofshof vandag is twee klagte van verkragting en roof met verswarende omstandighede tot die klagstaat gevoeg.
Die verdagtes verskyn weer Woensdag 20 Julie in die hof.
Mnr. Jakkals le Roux, voorsitter van Vrystaat Landbou se landelike veiligheidskomitee, sê wat presies aanleiding gegee het tot die gewetenlose dade waarin verskeie onskuldige mense hul lewens verloor het, is op hierdie stadium onbekend. Hy is nie bereid om te bespiegel oor wat die motief vir die sinlose moorde was nie.
“Ons vertrou dat behoorlike ondersoek deur die polisie daartoe sal lei dat suksesvolle vervolging en skuldigbevinding in die hof sal geskied. Die regstelsel kan nie in hierdie geval en alle ander gevalle waar onskuldige slagoffers hul lewens verloor, die gemeenskap verder in die steek laat nie.”
Hy sê dit is die grootste aantal mense wat hul lewe in ’n enkele plaasaanval in die Vrystaat verloor het sedert die landelike beveiligingstrategie in werking getree het.
