Die bouwerk aan die eerste windturbine van die Khobab-windplaas by Loeriesfontein, in die Noord-Kaapse distriksmunisipaliteit van Namakwa, is voor die beplande datum voltooi.
Volgens mnr. Kevin Foster, projekbestuurder, is die eerste van 61 turbines by Khobab binne die begroting voltooi en sal na verwagting in die volgende vier maande die eerste elektrisiteit aan die nasionale kragnetwerk kan lewer. Die projek se volle kapasiteit sal teen die einde van 2017 beskikbaar wees.
Dit duur sowat drie dae om die turbines, wat sowat 100 m bo grondvlak uittroon, op te hys en te installeer. Die swaarste komponent is die opwekkingseenheid en ratkas van bykans 83 ton. Dieselfde werkspan wat vir die Noupoort-windplaas en die nabygeleë Loeriesfontein-projek verantwoordelik is, behartig die oprigting.
Khobab se totale elektrisiteitsopwekking sal na verwagting 563 500 MWh per jaar beloop, wat krag aan tot 120 000 Suid-Afrikaanse huishoudings sal kan verskaf.
