Miljoene rand se skade is ’n paar weke gelede aangerig toe betogers Kirkwood se strate ingevaar en munisipale voertuie verwoes en geboue, onder meer die ANC-kantoor, afgebrand het. Sedertdien kon nog nie daarin geslaag word om met mnr. Mbulelo Kebe, die dorp se burgemeester, ’n vergadering te hou nie, sê mnr. Stef Delport, die DA-raadslid op die munisipale raad.
Delport sê dit is nie duidelik waar Kebe hom bevind nie, aangesien die betogers gedreig het om hom dood te maak en sy huis af te brand. “Op ’n byeenkoms wat kort ná die voorval deur die departement van plaaslike regering in die Oos-Kaap gereël is, is die onderneming nietemin gegee dat alle besware ondersoek en ’n verslag opgestel sal word, wat weer aan die gemeenskap voorgelê sal word.”
Mnr. Flippie Ehlers, voorsitter van die Sondagsrivier-sakekamer, het die skade van nagenoeg R100 miljoen as die “grootste tragedie in die bestaan van die vallei” bestempel. “Tagtig persent van die dorp het nie straatligte nie. Mense in die township sit vir tot twee weke lank sonder water. Alles gaan oor swak finansiële bestuur en kontrakteurs wat aangestel word en nie die werk behoorlik doen waarvoor hulle betaal word nie.”
Ehlers sê dit bly ’n plofbare situasie. “Hier is genoeg water; dit is die verspreiding daarvan wat die probleem is. Boere word ook geraak, aangesien van die grondwaardasies tot 700% verhoog is sonder dat hulle ooit geraadpleeg is.”
Ehlers sê hy is op pad na ’n munisipale kongres in Durban waar hy hoop om self met mnr. Pravin Gordhan, Minister van Koöperatiewe Regering en Tradisionele Sake, samesprekings te voer.
Mnr. Deon Joubert, voorsitter van Agri Kirkwood, sê aangesien die onluste teen die einde van die sitrus-paktyd uitgebreek het, is boere in die Sondagsriviervallei nie té erg daardeur geraak nie. “Baie van die werkers by die pakhuise woon egter in die Moses Mabida-township, wat die ergste deur die gebrekkige dienslewering geraak word. Boere is bekommerd dat die probleme ook na plase kan oorspoel as permanente oplossings nie gevind word nie,” het Joubert gesê.
Delport het toegegee dat daar foute met die berekening van grondbelasting ingesluip het, maar dat dit reggestel sal word. “Ongelukkig is daar ook diegene wat die meeste kla, maar wat baie geld aan die munisipaliteit skuld.”
