Simpson is op 28 September verlede jaar in hegtenis geneem nadat hy Qiniso Dlamini (17) na bewering vroeër dieselfde dag op Simpson se plaas in die distrik Glencoe doodgeskiet het. Hy is aangekla van moord en die besit van ongelisensieerde vuurwapens en ammunisie.
Landbou.com het vroeër berig dat Simpson rondloperbeeste, wat onwettig op sy plaas gewei het, by ’n kraal ingejaag en die polisie ontbied het. Voordat die polisie opgedaag het, het Dlamini en onbekende mans na bewering gewelddadig probeer om die beeste te bevry.
Dlamini en van die mans het glo met Simpson handgemeen geraak om besit van Simpson se vuurwapen. Volgens berigte ’n skoot tydens die worsteling afgegaan en Dlamini noodlottig gewond.
Mnr. Jacques Broodryk, woordvoerder by AfriForum, sê die organisasie, wat geskrewe vertoë ingedien het dat die strafregtelike klagte Simpson teruggetrek moet word, is bly dat Simpson nou die voorval op die agtergrond kan skuif. “Hoewel die verlies van ’n lewe altyd jammer is, is ons van mening dat Simpson volgens die beskikbare bewyse nooit aangekla moes word nie.”
Kwanalu vra vir landelike veiligheid
Die KwaZulu-Natalse Landbou-unie (Kwanalu) sê die organisasie is tevrede dat reg en geregtigheid in Simpson se saak geskied het. Die organisasie was deurentyd betrokke by die saak en sê dit is uiters belangrik dat elkeen geregtig is op ’n regverdige wetlike proses.
“Ons glo dat die vervolgingsgesag hom meer moes bemoei het met die bewyse wat tydens Simpson se eerste verskyning voorgelê is, aangesien die onwilligheid om hierdie bewyse in ag te neem daartoe gelei het dat borgtog nie aan hom toegestaan is nie en hy vir vyf maande aangehou is.”
Die kwessie van rondlopervee op private eiendom is ’n ernstige saak wat ’n helder toepassing van wetgewing verg, sê Kwanalu. “Daar kan geen plek gelaat word vir eie interpretasie of verpolitisisering van sulke sake wat tot konflik en onstabiliteit in landelike gebiede lei nie.”
Kwanalu sê verskeie grondeienaars word deurlopend bedreig en ervaar ekonomiese sabotasie weens ’n gebrek aan reg en geregtigheid, min of geen reaksie op misdaad nie en ’n gebrek aan toegewydheid deur owerhede. Kwanalu het ’n beroep op alle belanghebbendes, staatsdepartemente en die polisie gedoen om hulself daartoe te verbind om ’n stabiele en veilige landelike ekonomie te skep.
Mnr. Kobus Visser, Agri SA se direkteur van landelike veiligheid, sê Simpson se geval is weer ’n voorbeeld van waar tydige optrede deur die Suid-Afrikaanse Polisiediens ’n tragedie kon voorkom het.
“Daar is te veel gevalle waar die polisie te laat of soms selfs glad nie teen onwettige betreding optree nie en dan volg daar ’n tragedie. Hopelik sal die nuwe Betredingswet, wat ’n verdere onus op die polisie plaas om in betredingsgevalle op te tree, help om toekomstige dergelike situasies te vermy.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
