Die kleinste koringoes in dekades word in die komende seisoen deur Graan SA en die Oesskattingskomitee verwag.
Luidens die mees onlangse oesskattingsverslag sê die komitee boere is tans van voorneme om in die komende seisoen sowat 547 200 ha koring aan te plant. Dít is 9,5% oftewel 57 500 ha minder as die koring wat verlede jaar aangeplant is.
“Dit is ook die kleinste oppervlak beplant met koring sedert die vroeë 1900’s,” lui die verslag. Die provinsie waar na verwagting die meeste koring aangeplant sal word, is die Wes-Kaap met 265 000 ha, gevolg deur die Vrystaat met 168 000 ha en die Noord-Kaap met 44 000 ha.
Winsgewendheid
Mnr. Andries Theron, ondervoorsitter van Graan SA, sê die grootste rede vir die kleiner aanplanting is die feit dat dit nie meer winsgewend is om koring aan te plant nie.
Hy verwag dat aanplantings in die Wes-Kaap met 7% kan daal, terwyl hy meer drastiese dalings in die Oos- en Wes-Vrystaat verwag. In die Oos-Vrystaat is gebrekkige grondvog ’n groot probleem.
“Ek meen die komitee se skatting is optimisties. Ek verwag ’n kleiner oes,” sê Theron. Hy sê die grootste rede agter gebrekkige winsgewendheid is die prysstruktuur. Hy sê ’n beter prysbepaling sal die bedryf baie help.
“Die koringbedryf ding regstreeks mee met ’n stelsel vir mielies en sojabone. Met koringaanplantings is daar altyd ’n probleem. Soms is dit die gradering en ander kere die reën, maar daar is altyd iewers ’n probleem,” sê Theron.
Mielies
Intussen is die skatting vir die mielie-oes wat tans op die lande, staan afwaarts aangepas, soos wat deur die landbousektor verwag is. Dié oes sal na verwagting 11,121 miljoen ton sal wees. Dit is sowat 1,63% laer as die vorige skatting van 11,306 miljoen ton.
Die oppervlakte onder mielies is na verwagting 2,699 miljoen ha met ’n verwagte gemiddelde opbrengs van sowat 4,12 ton/ha is. Die opbrengs is vroeër op 4,19 ton/ha geskat.
Die produksieskatting vir wit mielies is 6,415 miljoen ton. Dit is sowat 124 000 ton laer as die vorige skatting van 6,539 miljoen ton. Die produksieskatting vir geel mielies is ook laer op 4,706 miljoen ton. Dié vorige skatting was 4,766 miljoen ton.
25 April 2012
