As jy boonop hou van skaapkop, afval, beesstert en allerlei boerekos van die plaas, is hierdie net die geleentheid om jou hele gesin aan al dié heerlikhede bloot te stel.
“Ons wil graag die jeug van die landbou bewus maak en toesien dat hul ervaring van die landbou lekker is,” sê mnr. Jors Kriek, ’n plaaslike boer en voorsitter van die landbou-akademie se direksie. Die pretdag dien terselfdertyd as opedag vir die skool – die eerste skool in die land wat herlewings- en presisielandbou op ’n praktiese wyse by sy leerplan insluit.
“Ons het drie jaar gelede al ’n leerplan begin ontwikkel vir herlewings- en presisie-landbou en dié spesialisasie is uniek aan ons skool. Dit word aangebied vanuit ’n praktiese uitgangspunt, soos trouens al die landbouvakke wat ons aanbied.”
’n Praktiese demonstrasie van hoe gesonde grond lyk, toetse vir die grond se vermoë om water te behou, en allerlei leersame landbou-aktiwiteite vir kinders vorm deel van die dag. Kinders gaan wolbale dra, leer hoe om skape te tel en dan kyk wie tel die vinnigste en akkuraatste, op ’n wa en trekker rondry, en kyk wie die mooiste pakhuis uit karton kan bou.
Graan SA bied ’n kompetisie aan om te sien wie kan die vinnigste mielies skoonmaak en die Landbou-akademie se eie boerdery, wat skape, beeste, varke en konyne insluit, word uitgestal. Volgens Kriek is daar groot pryse op die spel in al die kompetisies. Daar is reeds meer as 25 uitstallers wat hul produkte kom vertoon.
“Enigeen wat dit wil bywoon, is meer as welkom; dis nie net jongmense wat die dag sal geniet nie. Ons nooi elkeen hartlik uit om te kom kyk hoe ernstig ons hier op Reitz oor die landbou is,” sê Kriek.
Die opedag vind plaas by die skoolterrein van die Reitz Gekombineerde Skool in Davelstraat en begin om 11:00.
Vir nog inligting, kontak me. Dricky Wessels by 084 400 0470.
