Die Parlement se portefeuljekomitee vir landbou, bosbou en visserye het genoeg gehad van die Departement van Landbou, Bosbou en Visserye se “volkome verontagsaming en minagting” om nie senior amptenare na sy vergaderings te stuur nie.
Die komitee wil me. Tina Joemat-Pettersson, Minister, en haar departement by pres. Jacob Zuma verkla. Amptenare het by twee geleenthede nie komiteevergaderings bygewoon nie. Verlede week is junior amptenare na ’n komiteevergadering gestuur.
Mnr. Langa Zita, direkteur-generaal, was afwesig op drie vergaderings. Selfs die Departement van Omgewingsake was afwesig met die laaste vergadering toe die dokument Norme en Standaarde vir die Bestuur van Probleemdiere in Suid-Afrika bespreek moes word.
Die Departement van Landbou het dr. Emily Mogajane afgevaardig as die senior amptenaar verantwoordelik vir dié omgewingskwessie, maar sy was ook afwesig. “Ons sal die saak moet bespreek met die hoofsweep en die President,” het mnr. Lulu Johnson, voorsitter van die komitee, gesê.
Hy meen die departement is arrogant en dat hy ernstige minagting teenoor die komitee toon.
Me. Manana Mabuza, ANC-LP, het bygevoeg dat dit 'n neiging is van die Departement van Landbou om mense te stuur wat nie vrae kan beantwoord nie. “Ons kan nie toelaat dat mense hul geld só mors nie. Ons sal ’n ongewilde besluit moet neem deur nie die departement se begroting goed te keur nie,” het sy gesê.
9 November 2010
