Met die kommer oor die besmetting van voedsel met E.coli weens die storting van riool in water, sê dr. Anthony Turton, ‘n kundige in water- en omgewingsake, hy meen besmetting weens chemiese besoedeling van water is ‘n groter probleem.
Luidens ‘n berig in Beeld (18 Oktober) het mnr. Noel van Zyl, hoofaankoper van Interfruit - wat varsprodukte aan Woolworths lewer - gesê hy is bekommerd oor toekomstige voedselproduksie, veral rondom rioolbesoedeling en die voorkoms van E.coli. Hy het tydens ‘n vergadering van die navorsingsnis vir die kulturele dinamika van water by die Noordwes Universiteit se Vaaldriehoekkampus, gepraat.
Van Zyl het aan Landbou.com gesê hulle het nog nêrens E.coli op varsprodukte gevind nie, maar as hulle sou, sal hulle kontrakte met die betrokke produsente moet stopsit, wat ‘n kettingreaksie van probleme tot gevolg sal hê. Hy sê as die besoedelingsituasie vir die volgende vyf tot 10 jaar voortgaan, groot probleme gaan ontstaan.
Wat doen E.coli?
Turton sê E.coli is bakterieë wat in die spysverteringskanale van die menslike liggaam voorkom en uitgeskei word. Hy sê dit is nie goed vir die liggaam na uitskeiding nie, maar meer belangrik kan dit help om goedkoop toetse te doen vir ander meer gevaarlike bakterieë wat deur rioolbesoedeling veroorsaak word.
Chemiese besoedeling
Turton is egter meer bekommerd oor chemiese besoedeling, soos radio-aktiwiteit, en die uitwerking wat dít op voedselproduksie, asook die landbou- en mynboubedrywe, die Regering en die verbruiker kan hê.
Hy meen dié bedrywe moet belê in onafhanklike navorsing oor die invloed van die besoedeling van water deur myne, chemikalieë en rioolstorting op menslike gesondheid asook voedselproduksie kan hê. “Dit sal help om die kredietwaardigheid van die land se voedselproduksie en vermoëns te herstel.”
Die “Tooth Fairy”-studie
Turton meen ‘n “Tooth Fairy”-studie, soos wat in 1959 in Amerika gedoen is, is nodig om radio-aktiwiteit te bepaal. Hy sê met dié studie is moeders gevra om hul kinders se melktande, in te stuur.
“Kinders is baie vatbaar vir kalsium, en radio-aktiewe stowwe stem baie met kalsium ooreen. Hul liggame neem dit dus makliker op en dié metode is ‘n maklike en praktiese manier om menslike materiaal te kry om te toets,” vertel Turton.
‘n Tweede studie wat Turton voorstel is ‘n lot-en-roete-studie. Daarmee kan bepaal word wat gebeur binne ‘n voedselketting en wat die uiteinde (lot) vir die laaste deel in die ketting is.
“Byvoorbeeld as ‘n ryer alge van ‘n besoedelde dam sou eet en vrek, kan die pad van besoedeling van die ryer af terug na die dam, die alge en die bron van besoedeling gevolg word om dit te probeer keer,” verduidelik hy.
19 Oktober 2010
