Vrystaatse boere is aangeraai om bedag te wees op vreemdelinge op hulle plase en misdadige elemente wat die politieke onstabiliteit in Lesotho wil uitbuit.
Mnr. Bernard Maree, voorsitter van Vrystaat Landbou se komitee vir wet en orde, sê hy is bekommerd dat onstabiliteit en ’n insinking in die ekonomie, wat normaalweg met ’n staatsgreep gepaard gaan, daartoe kan lei dat talle Lesotho-burgers oor die grens na Suid-Afrika stroom. Dit kan lei tot misdaad, soos vee- en voertuigdiefstal, asook plaasaanvalle.
Hy sê hoewel die SA Nasionale Weermag op die strook tussen Suid-Afrika en Lesotho diens doen, word die grens nie behoorlik bewaak nie. Die huidige onrus in Lesotho plaas volgens hom die kollig opnuut op grensveiligheid.
Mnr. Kobus Breytenbach, ondervoorsitter van Vrystaat Landbou, het die jongste pogings om die geskil te besleg, van die Suider-Afrikaanse Ontwikkelingsgemeenskap (SAOG) verwelkom, sodat stabiliteit in Lesotho gehandhaaf word.
Breytenbach het ook gemaan dat boere op hul hoede moet wees vir vlugtelinge wat tot voorvalle van misdaad aanleiding kan gee.
Volgens Maree het die voorvalle van veediefstal die afgelope maande langs die Lesotho-grens vanaf Clarens tot by Zastron toegeneem.
Die voorvalle het veral by Clarens, Ficksburg, Clocolan, Kommissiepoort , Ladybrand, Wepener en Zastron voorgekom. “Die waarde van die gesteelde vee nét by Ladybrand het in Julie en Augustus van tot R2 miljoen bedra,” sê hy. ’n Afname is wel by Phuthaditjhaba, Fouriesburg en Hobhouse aangeteken.
