Groot kommer bestaan oor die beoogde tolpaaie op die N1 en N2 in Kaapstad se omgewing en die uitwerking daarvan op boere se inkomste.
Luidens ’n berig in Die Burger (8 November 2011) het die Stad Kaapstad in verslae bekend gemaak dat die Wynland-tolpadprojek padgebruikers maandeliks tussen R400 en R800 uit die sak uit gaan jaag.
Dié verslae is as deel van dokumentasie van die stad se hofaansoek om die Suid-Afrikaanse Nasionale Padagentskap (Sanral) se tolpadplan, soos wat dit tans daaruit sien, geskrap te kry.
Volgens die berig is ’n studie in 2008 vir Sanral oor dié koste gedoen. Die studie bepaal dat die tolpadstelsel na verwagting vir 40 ritte per maand tussen die Baden Powell-afrit en Kaapstad tussen R400 en R480 gaan kos. Dieselfde aantal ritte tussen die Somerset-Wes-tolhek na Kaapstad sal tussen R560 en R800 per maand uitwerk.
Dié syfers kan egter hoër wees, aangesien die syfers wat vir die studie gebruik is, uit 2002 dateer.
Ongunstige uitwerking
Volgens nóg ’n studie wat by die hofstukke ingesluit is, word geskat dat die tolpaaie druiweboere jaarliks tussen R4 miljoen en R5 miljoen ekstra gaan kos. Dié boere gaan ’n groot deel van die koste self moet absorbeer, maar dit kan uiteindelik ’n karton druiwe se koste met 30c opstoot.
Mnr. Beyers Truter, voorsitter van die Pinotage-vereniging, sê dié tolgeld gaan “’n hengse ongunstige uitwerking” op vervoer in die algemeen hê. Hy sê baie wynboere se produkte moet op die N1 vervoer word, en “ons kan nie, veral as jy dink aan intreevlakwyne, nóg heffings bekostig nie”.
Dié koste kan ook ’n impak hê op die aantal seisoenswerkers wat wyn- en druiweboere in diens gaan neem.
Mnr. Kobus van der Merwe, bestuurder van die Landbougenootskap in Stellenbosch, sê die tolpadkoste gaan “baie, baie druk” op boere plaas. Hy sê dit sal veral wyn-, groente- en suiwelboere raak.
Bron: Die Burger
8 November 2011
