’n Spesiale verslag van die Spesiale Ondersoekeenheid (SOE) skets hoe enkele amptenare van dié departement vir grootskaalse korrupsie in die departement gesorg het. Bewerings van wanadministrasie, wanbestuur en onwettige optrede met die toestaan van grondtoelaes word ondersoek.
Volgens sy tussentydse ondersoekverslag fokus die SOE in hierdie fase op 36 verskillende sake, wat almal verband hou met geld wat in die vorm van grondtoelaes uitbetaal is. Dié vermeende bedrog het glo vanaf 1 Januarie 2006 tot 18 Februarie 2011plaasgevind.
“Die totale waarde van die toelaes wat ondersoek word, is R495 miljoen,” lui die verslag. Die ondersoeke van die SOE het gelei tot die inhegtenisneming van vier amptenare en ’n sakeman in Kwazulu-Natal. Al vier amptenare het borgtog.
Bedrieglike toekenning van toelaes
Die amptenare was na bewering betrokke by die bedrieglike toekenning van toelaes. Weens die ondersoek is hulle deur die departement geskors. Hierdie amptenare en nog ander word ook ondersoek vir die moontlike betrokkenheid by ongerymdhede in ander projekte wat die SOE ondersoek.
Met die ondersoek van die SOE is ook vasgestel dat die betrokke plase nooit na die begunstigdes oorgedra is nie. Dié plase is na eksterne entiteite oorgedra wat glad nie aan die toelaagproses verbind is nie.
Die ondersoek het ook gelei tot die beslaglegging van drie plase ter waarde van sowat R51 miljoen in Kwazulu-Natal. Luidens die verslag het die departement vyf bykomendesake wat verband hou met bedrog van sowat R90 miljoen rakende grondtoelaes.
Die SOE het ook agt sake oor toelaes met grondhervorming ter waarde van R91 miljoen na die Suid-Afrikaanse Polisiediens verwys. Altesaam 12 amptenare is in tugverhore en drie is geskors.
