Só het mnr. Roelf Pienaar, besturende direkteur van die appel-en-peerbemarkingsmaatskappy Tru-Cape, op ’n onlangse aanlyn mediasessie gesê.
Dit kos boere vanjaar sowat 25-30% meer om appels en pere te produseer.
“Een van ons kleiner produsente in Grabouw bestee tans sowat R150 000 per maand aan brandstof om kragopwekkers aan die gang te hou. Dis ’n massiewe koste om produkgehalte te verseker en die verspreidingsketting te handhaaf.”
Volgens mnr. Conrad Fick, bemarkingsdirekteur by Tru-Cape, ervaar supermarkte soortgelyke kostestygings, want hulle moet ook op kragopwekkers en dies meer staat maak.
“Dis ’n dubbele slag.”
Pienaar sê ‘n prysregstelling is nodig om te help absorbeer aan dié koste, maar hy glo nie verbruikers kan die hoër produksiekoste sluk nie.
“Ons verwag dat die appel- en peeroes in ons produksiegebiede (hoofsaaklik Ceres en Grabouw) 8-10% kleiner gaan wees. By Ceres is sowat 200 000 tot 250 000 kratte vrugte vernietig weens haelskade. Dis moeilik om koste in ’n gemiddelde produksiejaar te versprei.”
Boonop het sy onlangse besoek aan Berlyn vir die Fruit Logistica-ekspo gewys die prentjie lyk wêreldwyd nie te waffers nie.
“Ons sien dat stygende energiekoste en rekordhoë inflasie verbruikers oraloor onder druk plaas. Hulle sukkel om uit te kom met hul geld. Gevolglik sien mens ook dat sogenoemde afslagsupermarkte (soos Aldi en Lidl) markaandeel wen.”
Daar is selfs ’n neiging dat verbruikers eerder gewone, goedkoper kultivars verkies en wegbeweeg van klubkultivars soos Envy, Jazz en Kanzi.
“Dit is ’n aanduiding van hoe moeilik die mark tans is.”
Volgens Fick raak markte meer uitsoekerig oor wat hulle aanvaar of nie.
“Ons raak ook strenger oor wat by pakhuise ingaan. In ’n moeiliker mark moet jy versigtig wees met wat jy in ’n boks sit en uitvoer. As jy ’n fout maak en ongewenste gehalte of kultivars beland in die verkeerde mark, gaan jy jou in die pekel bevind.”
Produsente sal ook slim moet wees oor nuwe aanplantings en kultivars.
“Klubkultvars is onder druk en ek meen kleinhandelaars gaan meer konserwatief wees met dié dat verbruikers goedkoper produkte koop. Supermarkte gaan waarskynlik huiwerig wees om nuwe klubkultivars aan te skaf in die volgende jaar of twee.”
Ander kwessies
Pienaar sê Suid-Afrikaanse produsente het verlede jaar ’n baie moeilike produksieseisoen agter die blad en is tans “versigtig optimisties” oor wat die nuwe seisoen inhou. Die uitermatige warm Europese somer het ’n invloed op hul gewasse.
“Dit kan ’n gunstige markgleuf vir ons skep as die gehalte in die Noordelike Halfrond nie hou nie.”
Die hawe in Kaapstad gee ook steeds probleme weens ongunstige weerstoestande. Volgens Fick het die hawe in Januarie en Februarie onderskeidelik 55 en 52 minder bedryfsure gehad as verlede jaar weens sterk wind.
“Die doeltreffendheid is beter, maar die wind speel nie saam nie.”
Markvooruitsigte
Pienaar verwag die groei in appel- en peermarkte sal oor die volgende tien jaar in die Verre Ooste, Midde-Ooste en Indië sal wees.
“Ons ontgin nog nie die potensiaal in China nie. Ons is baie opgewonde oor die geleenthede daar, hoewel dit gaan tyd kos om te ontwikkel. Ons wag ook op toegang in die Filippyne en Thailand, wat goeie vooruitsige vir appels inhou. Ook Indië is opwindend, met massiewe geleenthede en ’n groot bevolking.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
