’n Praktiese handleiding oor pluimveeproduksie, Guide to Poultry Production, het so pas die lig gesien.
Die A6-gidsie het 64 bladsye en pas maklik in ’n boer se hempsak. Landbouweekblad is die uitgewer. Die handleiding skop af met die keuse waarvoor produsente te staan kom of hulle braaikuikens of eiers wil produseer, die markoorwegings wat hulle in ag moet neem asook die verskillende produksiestelsels waaruit hulle kan kies.
Praktiese wenke word onder meer gegee oor:
• Die oprigting van geskikte pluimveebehuising, die regulering van temperatuur en ventilasie.
• Hoe om goeie dagoud-kuikens in die hande te kry.
• Voeding vir braaikuikens.
• Hoe om die verspreiding van pluimveesiektes te voorkom.
• Hoe om Newcastle-siekte te bestuur.
• Die behoorlike bestuur van vrylopende (free range) hoenders.
• Produksie met inheemse hoenders.
• Die opskerping van bestuursbeginsels om tred te hou met genetiese vooruitgang.
Die handleiding is grootliks gebaseer op ’n reeks artikels wat Wilma den Hartigh oorspronklik vir Farming SA geskryf het op grond van inligting wat onder meer voorsien is deur dr. Deryn Petty asook mnre. Arno Furstenberg, Jan Grobbelaar, James Jenkinson, Timothy Magayisa, Keith Millard en Herman van Staden.
Bykomende bydraes is gelewer deur Glenneis Kriel asook drs. Mick Versfeld en Ed Wethli. Dr. Mick Versveld, ’n bekende pluimvee-veearts van Kaapstad, het onder meer bydraes gelewer oor hoe ’n produsent die beste begin vir sy kuikens kan verseker en hoe hy sy prestasie met braaikuikens kan verbeter.
Die gids word afgesluit met wenke vir produsente wat graag met verskillende pluimveerasse skou.
Die boekie kos R75 (BTW en posgeld ingesluit). Bestellings: Tel. 021 406 4962 of stuur ’n e-pos na lbw@media24.com.
1 November 2011
