‘n Transaksie vir die koop van Yara Internasionaal se plaaslike kleinhandel kunsmis-bedrywighede deur Farmsecure Technologies (Edms) Bpk, is deur die Mededingingskommissie goedgekeur.
Luidens ‘n verklaring het die maatskappye reeds in Mei vanjaar bekend gemaak dat hulle die ooreenkoms aangegaan het. Die goedkeuring van die kommissie was die finale stap in die proses en die transaksie sal nou afgehandel word.
Alle bates, werknemers, agente asook die historiese Kynoch-handelsmerk is deel van die transaksie en Farmsecure Technologies se voornemens is om die besigheid te herdoop na ‘Kynoch Kunsmis’. Kynoch sal die eksklusiewe verspreider van Yara Internasionaal se reeks kunsmisprodukte wees, lui die verklaring.
Invoerder en massamenger
Kynoch sal ‘n invoerder, massamenger, verspreider en kleinhandelaar van ‘n volledige reeks van droë, vloeibare en spesialiteit kunsmis wees.
“Ons sien uit daarna om ‘n verskaffer te wees aan Kynoch as ons grootste kliënt in Afrika,” het mnr. Trygve Magnussøn, hoof van Yara se Afrika sake-eenheid opgemerk.
Mnr. Schalk Lubbe, hoof-uitvoerende beampte van Farmsecure Technologies, sê: “Ons is trots daarop om betrokke te raak en sien daarna uit om Suid-Afrikaanse boere te bedien met wêreldklas kunsmisprodukte, te same met ‘n diep passie vir Suid-Afrikaanse landbou.”
1 September 2010
