Me. Helen Zille, nasionale leier van die Demokratiese Alliansie (DA), meen mnr. Lourie Bosman, DA-LP, is steeds die regte landbouleier vir die DA. Dít volgens mnr. James Selfe, voorsitter van die DA se federale raad.
Gegewe die omstrede Agri Mpumalanga-kunsmisdebakel, wou “Boerevriend” vanuit die Wes-Kaap verlede week in Landbouweekblad se brieweblad weet of dit nie Bosman se morele plig is om te bedank nie. “Dit lyk of Bosman in goeie trou opgetree het, maar vir ‘n persoon in ‘n openbare amp is dit nie goed genoeg nie, want die gevolge dra groot gewig. Ons verwag dit (‘n bedanking) immers van politici wat droogmaak.”
Selfe sê LP’s moet bedank wanneer hul gedrag as openbare figure daarop dui. “Dié voorval het plaasgevind voordat Bosman ‘n LP geword het. Bosman hou vol dat hy in goeder trou opgetree het as hoofbestuurder. Indien sy se weergawe van die gebeure akkuraat is, is hierdie nie ‘n kwessie van swak korporatiewe bestuur nie en ons sien geen rede hoekom hy moet bedank nie.
Indien ander inligting egter na vore kom, wat die saak in ‘n ander lig stel, sal ons die saak weer moet ondersoek.”
Wat het gebeur?
Bosman, destydse hoofbestuurder van Agri Mpumalanga, het ‘n paar jaar gelede van ‘n kunsmistransaksie te hore gekom en die provinsiale organisasie se dagbestuur daarvan verwittig. ‘n Besluit is geneem dat die organisasie as middelman sou optree om kunsmis namens tientalle boere te bekom.
Die transaksie het egter skeefgeloop en die betrokke kunsmismaatskappy, Eurostar, is gelikwideer. Zille is verlede jaar oor die storie ingelig en Bosman het die saak in diepte met die DA bespreek.
“Die dagbestuur het Bosman destyds ‘n mandaat gegee om met die transaksie voort te gaan en hy het die besluite uitgeoefen,” sê Selfe. “Die feit dat Agri Mpumalanga se dagbestuur die verkeerde besigheidsbesluit gemaak het, het geen invloed op Bosman se vermoë om vir landbouers in die Parlement te baklei nie. Dit is ‘n taak wat hy met onderskeiding verrig. Bosman glo steeds dat die dagbestuur die besluit geneem het wat hulle geglo het tot voordeel van landbouers sou strek.”
Nadat Bosman reeds as hoofbestuurder bedank het, het Agri Mpumalanga se dagbestuur besluit om dié organisasie onder vrywillige likwidasie te plaas. Die proses is steeds aan die gang. Selfe sê Bosman stem nie noodwendig saam met dié besluit van die dagbestuur nie.
Lees ook die volgende berigte oor die kwessie:
Agri Mpumalanga ondersoek kunsmis
Woelinge rondom Agri Mpumalanga
7 Oktober 2010
