Hierdie gids is volgens Kwanalu bedoel om alle vroulike entrepreneurs in die provinsie, veral dié in die landbou en in landelike gebiede, in staat te stel om waardevolle blootstelling op Kwanalu se sosiale media en ander platforms te kry en om hul sakenetwerke uit te bou en saam te werk met eendersdenkende vroue vir wedersydse besigheidsgroei.
“Die vroue in die gids sal insig gee in die dinge waarvan vroue in die bedryf graag wil leer en ondersteun word. Ons hoop om alle vroue te verbind, samewerking te bewerkstellig en hulle te inspireer deur die wonderlike entrepreneursverhale wat regdeur KwaZulu-Natal bestaan,” sê me. Sandy la Marque, Kwanalu se uitvoerende hoof.
Die gids is op Kwanalu se webwerf, www.kwanalu.co.za, beskikbaar. Vroulike entrepreneurs en besigheidseienaars wat die aanlyn profielvorm vir die gids ingevul het, se inligting word daar vertoon. Alle geregistreerde deelnemers aan hierdie veldtog sal ingeskryf word vir ’n gelukkige trekking met pryse van R20 000. Die pryse sluit geleenthede vir persoonlike en besigheidsgroei in.
“Ons wil maniere vind om belangrike gesprekke oor die ondersteuning van vroue en hul lewensbelangrike bydrae tot hul gemeenskappe, mikro-ondernemings en die breër ekonomie in die algemeen te handhaaf. Ons sal voortgaan om waardevolle hulpmiddels en prosesse aan te bied wat die landelike en landbousektor sal versterk,” sê La Marque.
Kwanalu sê die gids bou voort op die landbou-unie se inisiatief vir landelike entrepreneurskap vir vroue en die jeug wat in Oktober 2021 bekend gestel is. Hierdie inisiatief is daarop gemik om die voortslepende werkloosheid in KwaZulu-Natal aan te pak deur mikro-ondernemings wat deur vroue en jeugdiges besit word, ’n hupstoot te gee. Dit word bereik deur sake- en ingesteldheidsopleidingsprogramme binne die provinsie se landelike en landbougebiede aan te bied.
Die inisiatief het reeds 1 500 vroue en jeugdiges bygestaan en volgens Kwanalu begin inspirerende suksesverhale na vore kom.
“Ek is verstom oor die veerkragtigheid van plattelandse vroue in hul poging om vir hulself ’n bestaan te skep op watter manier hulle ook al kan. Ek is bly dat die jong mense wat by hierdie program betrokke is, karakter en dankbaarheid getoon het vir die geleenthede wat gebied word. Hierdie inisiatief verskaf die hulpmiddels, mentorskap, netwerke en hulpbronne om denkwyses en lewens te verander,” sê dr. Kathy Hurly, die projekbestuurder van die inisiatief.
