’n Volwaardige wynbedryf vir KwaZulu-Natal, duisende hektare se bykomende bosbouplantasies sowel as verwerkingsaanlegte vir vleis en sojabone is van die landbouprojekte wat op ’n beleggersberaad in Durban aan voornemende beleggers voorgehou is.
Me. Judy van Niekerk, wat in 2004 The Stables (die provinsie se eerste wynlandgoed) begin het, sê daar is talle geleenthede binne die provinsie se wynbedryf. KwaZulu-Natal is in 2005 as ’n Wyn van Oorsprong-streek geregistreer.
Oor bosbou-geleenthede sê mnr. Steven Ngubane, sakeontwikkelingsbestuurder van Bosbou Suid-Afrika, daar is geleentheid vir sowat 40 000 ha se nuwe bosbouplantasies binne kommunale gebiede. Dit kan in vennootskap met gemeenskappe ontgin word.
KwaZulu-Natal se handels- en ontwikkelingsagentskap het ook sowat R350 miljoen se ontwikkelingsprojekte aan voornemende beleggers voorgehou.’n Chinese maatskappy soek vennote om saam tot R100 miljoen in ’n vleisverwerkingsaanleg in die provinsie te belê.
’n Plaaslike maatskappy soek ook R100 miljoen se beleggings in ’n sojaboonverwerkingsaanleg by Pietermaritzburg.
13 September 2010
