Die KWV weet nog nie van die Britse drankmaatskappy Halewood se planne om ‘n aanbod vir KWV Holdings te maak nie.
Die webtuiste Fin24.com berig hulle besit dokumente wat wys dat Halewood ‘n “ ’n sterk belang uitspreek om in gesprek met KWV te tree, wat daartoe kan lei dat Halewood deel van ’n transaksie word wat daarop gemik is om die gesamentlike belange van beide maatskappye en hul aandeelhouers aan te spreek”.
Volgens die berig word ‘n aanbodprys nie gemeld nie, maar ‘n “aanduidende voorwaardelike nie-bindende aanbod” is vir middel Januarie aangeteken.
By navraag het me. Hymli Krige, woordvoerder van die KWV, gesê sy is nie bewus hiervan nie. Mnr. Thys Loubser, hoof- uitvoerende beampte, kon nie op sy selfoon bereik word nie. Krige sê dit beteken Halewood het nog nie sy belangstelling formeel aan die KWV oorgedra nie.
Indien Halewood wel flikkers na KWV gooi, kompeteer hy saam met Pioneer Foods om dié Paarlse drankmaatskappy se hand. Pioneer het onlangs ‘n aanbod van R827 miljoen gemaak om die KWV oor te neem. Dit kom neer op sowat R12 per aandeel, waarvan ‘n kwart in Pioneer-aandele betaal sal word.
9 Desember 2010
