Die storm, wat die middag teen 17:00 begin het met donker, onheilspellende wolke, het boere en plaaswerkers laat skarrel om hul diere betyds onderdak te kry voor die reën begin.
“Toe ek sien met watter spoed die wolke opsteek, het ek my bakkie huis toe gevat dat hy onderdak kan wees. Ek was net by die huis toe begin daardie wind verskriklik waai. Nes ek dink hy kan nie vinniger waai nie, dan waai dit nóg harder,” vertel mnr. Chris Jacobs van die plaas Suurbult.
“Ek het toe besef iewers gaan ’n dak afwaai. Terwyl ek dit dink, staan en kyk ek na ’n groot ou bloekomboom op my plaas en daar skeur een van sy grootste takke morsaf.”
Hy vertel die wind het seker vir 30 minute erg gewaai en toe begin dit reën saam met die wind. Ná die storm het hy die skade gaan inspekteer.
“Toe ek by my skuur kom, sien ek maar hier is nou fout. Die hele voorste muur het omgewaai. Dit moes die wind gewees het.”
In die proses het van die sementstene teen sy stroper se voorkant geval, maar die skade was gelukkig minimaal. “In my leeftyd het ek nog nie so ’n wind beleef nie. Dit was werklik erg.”
Nog skade
By mnr. Max Tessendorf op die plaas Mossieshoek het die wind ’n metaalskuur getref. “Die wind het die dak inmekaar gedruk na die grond se kant toe, dit was nie ’n geval dat hy afgewaai is nie,” vertel Tessendorf.
“Tot die man wat die skuur vir my gebou het, sê hy het nog nooit in sy 30 jaar as bouer van staalkonstruksies so iets gesien gebeur nie. Die krag van die wind het dele van daardie metaalraamwerk gevou dat die staal soos ’n koeksister lyk. Dit was baie vreemd om te sien.”
Tessendorf sê benewens die skade aan die skuur self, het sommige werktuie ook skade gekry, maar daar was gelukkig geen lewensverlies weens die stormwind in die distrik nie.
“Op die dorp is drade uitgeruk en daar is nog boere in die distrik wat ook skade gely het.”
Volgens mnr. Lungile Makondo, ’n weervoorspeller van die Suid-Afrikaanse Weerdiens se kantoor in Bloemfontein, het ’n breë band donderstorms Maandagmiddag oor die sentrale dele van die Vrystaat beweeg. Dit het met sterk stormwinde gepaard gegaan wat plek-plek tot skade, soos op Hobhouse, gely het.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
