Die honderd jaar oue Suid-Afrikaanse kunsmismaatskappy, Kynoch, het met ingang van 1 Julie 2014 van eienaarskap verwissel.
Export Trading Group (Edms) Bpk (ETG), ’n multinasionale maatskappy met ’n groot voetspoor in Afrika, het die Kynoch-aandele van Farmsecure Holdings aangekoop.
ETG doen reeds die afgelope 30 jaar sake in Afrika en is tans werksaam in 42 lande. Die maatskappy se visie is om die voorste verskaffer van Afrika-landbouprodukte aan die wêreld te word.
Onder die nuwe ETG-eienaarskap is dit steeds “sake soos gewoonlik” vir Kynoch. Met sy visie om die voorste verskaffer van plantvoedingsoplossings aan boere in Suidelike Afrika te wees, bly Kyoch steeds aan die spits van nuwe tegnologieë en innovasie.
Kynoch het die produksiegeriewe, infrastruktuur en personeel om omvattende produkte en diens aan boere in die substreek te lewer. Die verkryging deur ETG via sy filiaal ETG Grains, sal Kynoch egter in staat stel om die logistiek, infrastruktuur en handelsinergieë in die ETG-groep te benut om die Kynoch-handelsnaam en -voetspoor in Suid- en Suidelike Afrika uit te brei en die nalatenskap wat oor die afgelope eeu daargestel is, voort te sit.
