Luidens ’n verklaring deur die KwaZulu-Natalse Landbou-unie (Kwanalu) het Williams haar boerderyloopbaan 12 jaar gelede begin as werknemer op die landgoedplaas Sekela wat naby die internasionale lughawe King Shaka by Durban geleë is.
Hoewel sy geen boerdery-ervaring gehad het nie, het haar bereidwilligheid om te leer daartoe gelei dat sy by piesangproduksie op die landgoed betrokke geraak het. Sy is gou bevorder tot die bestuurder van ’n deel van dié landgoedplaas se piesangboerdery.
“Williams het die geleentheid aangegryp en in die daaropvolgende jare die bestuur van verskeie van Sekela se piesangplase van altesaam 120 ha oorgeneem. In 2013 het sy uitgebrei na makadamia-produksie, wat nou oor 150 ha strek,” lui Kwanalu se verklaring.
Die beoordelaars in KwaZulu-Natal was veral beïndruk met Williams se vasbeslotenheid, wat blyk uit die feit dat sy alles wat sy nou van boerdery weet, van die grondvlak af geleer het.
Sy het baie tegniese aspekte bemeester, pas omgewingsbewuste stappe toe en is betrokke by opheffingspogings in haar plaaslike gemeenskap. Dít het perfek ingepas by die beoordelaars se beoordeling van die deelnemers se bestuurs- en sakefilosofie, tegniese bekwaamheid en algehele visie vir die toekoms van hul landbou-onderneming.
Die verklaring haal Williams aan as passievol oor die bewaring van die natuurlike omgewing en om hierdie rede soek sy voortdurend maniere om die gebruik van insek- en onkruiddoders in haar boerdery tot die minimum te beperk.
“Ek is ’n byeliefhebber en het basiliekruid en ander plante ingebring om goeie insekte na die plaas te lok. Ek maak ook seker dat ons die natuurlike bos en waterweë bewaar om die kwesbare ekostelsels op die plaas te versorg,” sê sy.
“Nadat ek by die tegniese en administrasie-aspekte van boerdery betrokke was, het ek geleer dat dié twee hand aan hand gaan om ’n boerdery doeltreffend te hou. Gevolglik kan baie geld bespaar word wanneer hierdie elemente nie afsonderlik beskou word nie.”
Williams het haar visier daarop gerig om die makadamia- en piesangondernemings te verfyn sodat hulle winsgewender word. Hierdie strategie sal proewe met nuwe makadamia-soorte en meer presiese bestuur vir beter neutgehalte insluit. Die piesangonderneming sal uitgebrei word om by te dra tot werk- en sakegeleenthede in die gemeenskap rondom Sekela.
“Ons bied geleenthede vir ons personeel om by nuwe afdelings betrokke te raak, net soos dit aan my gegun is. Om te sien hoe hul groei en passie vir boerdery ontwikkel en hulle in staat stel om vir hul gesinne te voorsien, is uiters verblydend,” sê Williams.
“Ek is so opgewonde en oorweldig om hierdie toekenning en erkenning ná al die jare te ontvang. Dit is ook wonderlik vir vroue in die algemeen dat ’n vrou dit uiteindelik in KZN gewen het. Dit is ’n voorreg om die eerste vrou te wees wat dit doen.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
