RCL Foods sê hy het oorstromings in die omgewing van sy belangrikste hoenderverwerkingsaanleg in KwaZulu-Natal beleef. Dit het daartoe gelei dat 1,5 verwerkingskof op een dag verlore gegaan het omdat werknemers nie na en van die werk kon reis nie.
“Die oorstroming by die aanleg en die puin en modder op die toegangspaaie moes opgeruim word,” sê mnr. Marthinus Stander, besturende direkteur van RCL se hoenderafdeling. “Een van ons hoenderhuise is beskadig. Bedrywighede op albei terreine is intussen hervat.”
Slagbedrywighede gaan voort soos beplan, met die hoenders wat geslag word teen die beoogde gewig. “Daar is koste wat met die vloed verband hou, maar dit sal nie die oorhoofse koste wesenlik raak nie.”
Stander sê baie van die hoenderafdeling se werknemers is geraak deur vloedskade aan hul huise en paaie, en die gebrek aan basiese dienste soos water en elektrisiteit.
“Direk ná die vloed het ons ’n groter nadelige uitwerking op ons bedrywighede verwag, maar ons werknemers het daarin geslaag om werk toe te kom. Ons loof hulle vir hul groot en toegewyde pogings in dié verband en hul ongelooflike veerkragtigheid.”
Die afdeling kan steeds voer aan al sy hoenders en plase verskaf, “maar padtoestande is regtig sleg en daar is baie modder. Voertuie val dikwels vas, maar ons maak ’n plan.
“Hoewel paaie nou in ’n baie erger toestand is as tevore, slaag ons daarin om al ons klante te bedien,” sê Stander.
Astral kyk na skade aan plaaspaaie
Die pluimveeprodusent Astral Foods se verwerking van braaihoenders by sy Mountain Valley-aanleg in Camperdown is op 12 April ontwrig omdat toegangspaaie oorstroom was.
Mnr. Frans van Heerden, besturende direkteur van bedryfsake by Astral, sê van die werknemers kon op 12 en 13 April weens ’n gebrek aan vervoer nie by die werk uitkom nie.
Astral het nie groot skade aan geboue en infrastruktuur gely nie, maar skade aan landelike paaie skep struikelblokke om goedere doeltreffend te kan vervoer.
“Padinfrastruktuur op plase is erg beskadig, maar met die hulp van boere en hul toerusting kon Meadow-voeraflewerings plaasvind.
“Die omvang van skade aan ons eie plaaspaaie word vasgestel. Ons bedrywighede is intussen ten volle op dreef.”
Enige vertragings wat die maatskappy tydens die swaar reën ten opsigte van ingevoerde voerbestanddele ondervind het, is intussen uit die weg geruim.
Melkbedrywighede gaan voort
Mnr. Colin Wellbeloved, voorsitter van die direksie van die Melkprodusente-organisasie (MPO) en ’n melkboer van Howick in KwaZulu-Natal, sê melkboerderye het min ontwrigting ervaar omdat hulle nie in die gebiede boer waar die groot vloedskade was nie.
“Ons bedrywighede was dalk ’n klein bietjie moeiliker, maar ons is almal nou al baie gewoond aan ontwrigting. Dit kan gebeur het dat ’n boer melk nie dadelik by die fabriek kon uitkry nie en dit kon tot sy koste bydra, maar ons het regtig min ontwrigting gehad.
“Boere het so veerkragtig geword en is gereed om ontwrigtings te bestuur. As ’n melkboer verwag ’n mens ook nie dat jy 365 dae van die jaar perfekte dae sal hê nie. Ons is almal goed daarmee om ’n plan te maak,” sê Wellbeloved.
