Slegs sowat 16,6 miljoen ton suikerriet, een van die laagste oeste in 18 jaar, sal na verwagting weens die droogte vanjaar ge-oes word, sê SA Canegrowers.
Luidens ‘n berig op Meat Trade News Daily sê mnr. Suresh Naidoo, voorsitter van die vereniging, dié skatting is onlangs aangepas van ‘n vroeëre verwagte 19 miljoen ton.
Volgens hom lewer die bedryf jaarliks gemiddeld 23 miljoen ton suikerriet. Volgens die berig sal die grootste oeste van die Maidstone meulenaarsgroep, wat hulle verwagte oes van 1,06 miljoen ton na 660 000 ton aangepas het, asook Darnall, wie se oes 32% laer geskat word, kom.
Twee jaar om te herstel
Naidoo sê dit kan party boere tot twee jaar neem om van dié terugslag te herstel. Van die produsente, soos Illovo, Union Co-op, wie se oes 3,5% laer geskat word, en Noodsburg wie se oes na verwagting 10% minder gaan wees, sal eers in 2011 die invloed van die droogte voel.
Om winsgewend te wees moet ‘n suikerprodusent 60 ton per ha produseer. Die jaar se oes het oor die algemeen tussen 18 en 40 ton per ha gelewer. “Min oeste het 50 ton per ha of 60 ton per ha gelewer,” sê Naidoo. Hy sê die volle impak van die droogte op die suikerrietplante sal eers na die lentereëns bepaal kan word.
Hulp aan boere
Volgens Naidoo het hulle reeds hulp van die Regering en die Land Bank gevra om suikerboere te help met droogtehulp-geld asook hulp vir die heraanplanting van suikerrietplantasies. Grootskaalse heraanplantings is glo reeds op sekere plekke nodig en meeste suikerboere kan dit nie bekostig nie, aangesien die bedryf die afgelope vyf jaar swaar trek.
Mnr. Trix Trikam, die uitvoerende direkteur van die Suid-Afrikaanse Suiker Assosiasie (SASA), het vroeër aan Landbou.com gesê vir die 2010/11 seisoen verwag hulle ‘n suikeroes van 2,07 miljoen ton. Dit is die laagste in 15 jaar.
Intussen het me. Tina Joemat-Pettersson, die Minister van Landbou, Bosbou en Visserye, tydens Agri SA se jaarkongres aangekondig dat dele van KwaZulu-Natal as rampgebiede verklaar moet word sodat droogtehulp aan boere gelewer kan word.
20 Oktober 2010
